«Лукашэнка і яго паплечнікі не ўсьведамляюць, наколькі яны нікчэмныя». Wyborcza адрэагавала на прызнаньне Пачобута «тэрарыстам»

Анджэй Пачобут. Архіўнае фота

Намесьнік галоўнага рэдактара буйнога польскага выданьня Gazeta Wyborcza Барташ Веліньскі заявіў, што быў ашаломлены, даведаўшыся пра чарговыя рэпрэсіі, якія абрынулася на ягонага калегу.

Журналіст і адзін зь лідэраў Саюзу палякаў Беларусі Анджэй Пачобут застаецца за кратамі ўжо 1,5 года, неўзабаве над ім пройдзе суд.

Разглядаць так званую «польскую справу», у межах якой вінавацяць палітзьняволенага, імаверна, будуць у Горадні.

ГЛЯДЗІЦЕ ТАКСАМА:

Палітзьняволенага журналіста Пачобута дадалі ў «тэрарыстычны спіс»

Учора стала вядома, што Анджэя Пачобута дадалі ў «тэрарыстычны спіс». На гэтую навіну імгненна адрэагавалі калегі журналіста з польскага выданьня Gazeta Wyborczа, супрацоўнікам якой цягам многіх гадоў ёсьць Пачобут.

«Я быў ашаломлены, даведаўшыся пра чарговыя рэпрэсіі, якія абрынулася на нашага калегу Анджэя Пачобута з боку беларускага рэжыму, — напісаў намесьнік галоўнага рэдактара Gazeta Wyborczа Барташ Веліньскі. — За амаль 600 дзён зьняволеньня Анджэй прайшоў празь пяць беларускіх турмаў. Каб яго зламаць, трымалі яго ў тым самым месцы, дзе асуджаныя на сьмяротнае пакараньне правялі апошнія дні жыцьця. Ён не зламаўся, не прызнаў сябе вінаватым і не прасіў у дыктатара Аляксандра Лукашэнкі літасьці і дазволу выехаць у Польшчу».

Веліньскі адзначае, што празь нязьменную пазыцыю Анджэя Пачобута рэжым выставіў супраць яго новыя абвінавачаньні і ўнёс яго ў сьпіс «тэрарыстаў».

«Анджэй тэрарыст? Лукашэнка і ягоныя паплечнікі не ўсьведамляюць, наколькі яны нікчэмныя. Анджэй гэта хадзячая прыязнасьць і дабрыня. Памятаю, як ён зайшоў у рэдакцыю і зьзяў. Чалавек, які прыехаў з паняволенай краіны, здаваўся больш аптымістычным, чым мы, якія жывуць у свабоднай дзяржаве. Адзінай зброяй, якую выкарыстоўваў Пачобут, была асадка. І, пэўна, таму рэжым лічыў яе сьмерцяноснай. Як доказ віны ён выкарыстоўвае артыкулы, апублікаваныя Анджэем у Gazecie Wyborczej.

Працэс над ім хутка пачнецца ў судзе ў Горадні. Не сумняваюся, што прысуд будзе драконаўскім. У перададзеным кантрабандай з турмы жарце Анджэй напісаў, што з спакойным сумленьнем адправіцца ў лягер. Мы не забудзем пра Анджэя, не здамося. Будзем увесь час патрабаваць вызваленьня Анджэя Пачобута і іншых палітвязьняў беларускага рэжыму», — напісаў Барташ Веліньскі.

ГЛЯДЗІЦЕ ТАКСАМА:

Навіны палітвязьняў: Пачобута перавялі ў СІЗА Горадні, чакаецца суд

ГЛЯДЗІЦЕ ТАКСАМА:

Стала вядома, у чым вінавацяць лідэра польскай меншасьці Пачобута, якога ўжо 16 месяцаў трымаюць у СІЗА