Журналісты ВВС паводле адкрытых крыніц зьбіраюць сьпіс расейскіх вайскоўцаў, якія загінулі падчас уварваньня ва Ўкраіну. З пачатку вайны да 24 чэрвеня ім удалося ўстанавіць імёны ўжо 4010 вайскоўцаў: у статыстыку ўвайшлі і грамадзяне Расеі, якія добраахвотна пайшлі на вайну.
Журналісты адзначаюць, што колькасьць загінулых добраахвотнікаў «імкліва расьце» і пра страты сярод іх паведамляюць часьцей, чым пра любую іншую катэгорыю вайскоўцаў. Кожны тыдзень паступаюць паведамленьні аб гібелі 30-40 добраахвотнікаў, больш за 40% загінулых добраахвотнікаў — гэта людзі старэйшыя за 45 гадоў (палова зь іх — старэйшыя за 50 гадоў).
Таксама паведамляецца, што сярод усіх загінулых 17 працэнтаў — афіцэры. ВВС зьвязвае такія страты ў камандаваньні са структурай расейскай арміі. 20 працэнтаў загінулых служылі ў ВДВ, 19 працэнтаў — у мотастралковых войсках.
Таксама BBC паведамляе аб гібелі прынамсі 42 ваенных лётчыкаў.
Як адзначаюць журналісты, сабраныя зьвесткі не адлюстроўваюць рэальны ўзровень страт, бо яны абапіраюцца толькі на пацьверджаныя паведамленьні аб гібелі, а далёка не пра ўсіх загінулых паведамляюць публічна. Таксама ў названую лічбу ў 4010 вайскоўцаў не ўвайшлі зьніклыя бязь вестак і загінулыя, якія ўступілі ў войскі самаабвешчаных рэспублік Данбасу да 24 лютага 2022 году.
ГЛЯДЗІЦЕ ТАКСАМА: Ва Ўкраіне заяўляюць, што раніцай расейцы з тэрыторыі Беларусі абстралялі Чарнігаўскую і Жытомірскую вобласьці- Раней «Медиазона» апублікавала інфармацыю пра 3798 загінулых ва Ўкраіне расейскіх вайскоўцаў. Гэта толькі публічна пацьверджаныя страты, рэальная іх колькасьць, на думку аўтараў справаздачы, можа быць значна большай. Журналісты адзначалі, што больш за ўсё ахвяраў сярод дэсантнікаў, вайскоўцаў мотастралковых падразьдзяленьняў і танкістаў.
- Паводле брытанскай ваеннай выведкі, да канца траўня Расея страціла ва Ўкраіне каля 15 тысяч чалавек.
- Паводле зьвестак Генштабу Ўкраіны, колькасьць загінулых расейскіх вайскоўцаў перавысіла 30 тысяч.
- Расея пра свае страты ў вайне не паведамляе з канца сакавіка.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.