Міністэрства замежных спраў Расеі забараніла ўезд у краіну вышэйшаму кіраўніцтву ЭЗ у адказ на сустрэчныя санкцыі. Пра гэта паведамляецца на сайце МЗС.
«Абмежаваньні распаўсюджаныя на вышэйшае кіраўніцтва Эўрапейскага Зьвязу, у тым ліку шэраг эўракамісараў і начальнікаў вайсковых структураў ЭЗ, а таксама пераважную большасьць дэпутатаў Эўрапейскага парлямэнту, якія прасоўваюць антырасейскую палітыку», — гаворыцца ў заяве міністэрства.
У санкцыйны сьпіс МЗС РФ таксама трапілі прадстаўнікі ўрадаў і парлямэнтаў шэрагу краінаў ЭЗ, грамадзкія дзеячы і супрацоўнікі СМІ, якія «нясуць пэрсанальную адказнасьць за прасоўваньне незаконных антырасейскіх санкцый». Сам сьпіс яшчэ не апублікаваны.
- Пасьля пачатку вайны ва Ўкраіне Эўразьвяз увёў некалькі пакетаў санкцыяў супраць Расеі. Яны закранулі як фізычных асобаў (асабіста прэзыдэнта Ўладзіміра Пуціна, дэпутатаў, бізнэсоўцаў, мэдыйных асобаў), гэтак і юрыдычныя арганізацыі (у тым ліку расейскія банкі).