Паводле пэтыцыі, у праграме навінаў «24 гадзіны» на тэлеканале СТВ ад 29 верасьня ў выпуску «Тайныя спружыны палітыкі 2.0» (дзе Рыгор Азаронак расказваў пра застрэленага сілавікамі айцішніка Зельцара) у кадры паказалі скрыншоты з камэнтароў у адным з тэлеграм-каналаў, дзе на працягу некалькіх сэкундаў гледачы маглі назіраць незарэтушаванае паведамленьне са словамі «на**й б**дзь» (пазьней відэазапіс эфіру адрэдагавалі і лаянкавыя словы замазалі).
«Зьвяртаем увагу, што інфармацыйна-аналітычная праграма трансьлявалася ў прайм-тайм і ня мела знака ўзроставага абмежаваньня, а таксама не зьмяшчала папярэджаньняў аб магчымым выкарыстаньні нецэнзурнай лексыкі», — гаворыцца ў пэтыцыі.
Яе аўтары падкрэсьліваюць, што гэтым быў парушаны арт. 30 закону «Аб сродках масавай інфармацыі», і просяць Міністэрства інфармацыі разабрацца ў сытуацыі і вынесьці пісьмовае папярэджаньне тэлеканалу СТВ.
ГЛЯДЗІЦЕ ТАКСАМА: Сын за бацькам. Кароткая гісторыя кар’еры Рыгора АзаронкаШто адказалі ўлады
Зь Міністэрства інфармацыі прыйшоў адказ за подпісам намесьніка міністра Андрэя Кунцэвіча. У ім гаворыцца, што згодна зь інфармацыяй, прадстаўленай тэлеканалам СТВ, «з мэтай выключэньня дэманстрацыі ў эфіры дадзеных словаў фразы зь імі былі „размытыя“, аднак у сувязі з тэхнічным збоем у этэр трапілі кадры, на якіх „размыцьцё“ адсутнічала».
Сьцьвярджаецца, што да работнікаў, адказных за выпуск праграмы ў этэр, прымянілі меры дысцыплінарнага спагнаньня.
Таксама Андрэй Кунцэвіч адзначае, што, паколькі ў ходзе разгляду звароту ўстанавіць факт наяўнасьці нецэнзурных словаў у тэлепраграме «не зьяўляецца магчымым», падставы для прымяненьня Мінінфармам якіх-небудзь мер рэагаваньняў у дачыненьні да тэлеканалу СТВ, у тым ліку вынясеньня пісьмовага папярэджаньня, адсутнічаюць.
ГЛЯДЗІЦЕ ТАКСАМА: «Калі сапраўды мужык, ня будзь пасьмешышчам». Воіны-аўганцы пытаюцца, за што Азаронку далі мэдаль «За адвагу»