Лідэры 27 краін Эўразьвязу асудзілі дзеяньні Менску ў «інструмэнталізацыі мігрантаў і ўцекачоў», у выніку чаго на мяжы з ЭЗ утварыўся гуманітарны крызіс, і аб'явілі аб гатоўнасьці прыняць новыя санкцыі супраць рэжыму ў Беларусі. Пра гэта гаворыцца ў апублікаванай заяве саміту ЭЗ.
«Эўрапейская рада падкрэсьліла важнасьць найхутчэйшай рэалізацыі забаронных мер пасьля зацьвярджэньня пятага санкцыйнага сьпісу і заявіла аб гатоўнасьці прыняць новыя санкцыі ў выпадку неабходнасьці», — гаворыцца ў заяве.
«Эўрапейская рада падкрэсьліла важнасьць забесьпячэння бесьперашкоднага доступу для міжнародных арганізацый у Беларусь і пашырэньня гуманітарнай падтрымкі, а таксама садзейнічаньня вяртаньню мігрантаў на радзіму зь Беларусі», — зазначаецца ў дакумэнце.
У ЭЗ таксама заклікалі вызваліць усіх палітвязьняў і спыніць рэпрэсіі супраць грамадзянскай супольнасьці і незалежных СМІ. Акрамя таго, зазначаецца, што беларускі народ мае права абіраць прэзыдэнта на новых, свабодных і справядлівых выбарах.
Таксама лідэры краін Эўрапейскага зьвязу папярэджваюць Расею аб «масавых наступствах і цяжкіх стратах» у выпадку ваеннай агрэсіі супраць Украіны і заклікаюць вярнуцца да дыпляматычных мэтадаў дээскаляцыі напружанасьці.
Пра гэта гаворыцца ў выніковай заяве саміту Эўразьвязу ў Бруселі, які закончыўся 16 снежня. Заява заклікала да «абмежавальных захадаў, узгодненых з партнэрамі» ў Вялікай Брытаніі і ЗША.
Злучаныя Штаты, Эўразьвяз і Ўкраіна занепакоеныя павелічэньнем колькасьці расейскіх войскаў ля межаў Украіны, інтэрпрэтуючы гэта як магчымую прэлюдыю да ўварваньня.
ГЛЯДЗІЦЕ ТАКСАМА: Суд у Растове раскрыў інфармацыю аб пастаўках харчаваньня расейскім вайскоўцам на ДанбасеЛідэры ЭЗ зноў заклікалі Маскву вярнуцца да перамоваў у «нармандзкім фармаце» і рэалізацыі менскіх пагадненьняў, дзе Нямеччына і Францыя выступаюць пасярэднікамі паміж Украінай і Расеяй у пошуку палітычнага рашэньня для спыненьня канфлікту на ўсходзе Ўкраіны.
Расея адмаўляе пляны ўварваньня ва Ўкраіну і выстаўляе некалькі патрабаваньняў, у тым ліку прамога дыялёгу са Злучанымі Штатамі і запэўніваньняў, што Ўкраіна ня будзе ўступаць у NATO ў будучыні.
ГЛЯДЗІЦЕ ТАКСАМА: NATO ня бачыць скарачэньня расейскіх войскаў ля межаў Украіны і заклікае Расею да перамоўГенэральны сакратар NATO днямі заклікаў Расею да перамоў у фармаце рады «Расея — NATO». «Любая наступная агрэсія будзе мець наступствы і за гэта давядзецца заплаціць высокую цану», — падкрэсьліў Енс Столтэнбэрг.
Енс Столтэнбэрг зноў падкрэсьліў, што будучае сяброўства Ўкраіны ў Паўночнаатлянтычным альянсе ня можа быць прадметам кампрамісу:
«Украіна мае права выбіраць меры бясьпекі. Гэта фундамэнтальны прынцып эўрапейскай бясьпекі. І рашэньне далучыцца да NATO будуць ухваляць толькі Ўкраіна і 30 чальцоў альянсу».