Прадпрымальніка і блогера Сяргея Ціханоўскага затрымалі ў траўні 2020 году. З таго часу ён знаходзіцца за кратамі. Яго і групу палітвязьняў судзяць закрытым судом на тэрыторыі СІЗА-3 у Гомлі.
«Я запісваю гэтае відэа да абвяшчэньня так званага „прысуду“ Сяргею. Я ўяўляю, якая там будзе лічба, і вельмі складана будзе псыхалягічна яе прыняць. Але, з другога боку, год, дваццаць, сто гадоў — гэта ненармальна. Гэта незаконна і гэта ня тое, з чым можна мірыцца. Таму, камэнтуючы ягоны так званы „прысуд“, я буду задаваць сабе толькі адно пытаньне: што я буду рабіць з гэтай навіной?
А я буду працягваць бараніць чалавека, якога люблю і які стаў лідэрам для мільёнаў беларусаў. Я буду спрабаваць рабіць нешта вельмі складанае; магчыма, немагчымае, каб наблізіць той момант, калі мы зь ім убачымся ў новай Беларусі. Я буду працягваць дасылаць яму паштоўкі і малюнкі дзяцей, каб, калі мы сустрэнемся, зрабіць з гэтага памятны альбом.
І ўсё, што я раблю, я раблю дзеля гэтага моманту. Такі пэрсанальны момант ёсьць у кожнага чалавека. Засталося вырашыць, што кожны гатовы зрабіць, каб хутчэй ажыцьцявіць нашу мару».
14 сьнежня ў 14:00 на тэрыторыі СІЗА-3 Гомля абвесьцяць прысуд у справе журналіста Свабоды Ігара Лосіка, а таксама палітыкаў Міколы Статкевіча і Сяргея Ціханоўскага, блогера Ўладзімера Цыгановіча і ўдзельнікаў каманды Сьвятланы Ціханоўскай на выбарах 2020 году Арцёма Сакава і Дзьмітрыя Папова. Суд зь невялікімі перапынкамі ішоў 173 дні. Сьледзтва — больш за год.
Нягледзячы на тое, што палітвязьняў аб’ядналі ў адну групу, многія зь іх не былі знаёмыя асабіста ці ведалі адзін аднаго мала.
ГЛЯДЗІЦЕ ТАКСАМА: «Ад прысуду я не чакаю нічога добрага». Галоўнае аб працэсе ў справе Лосіка, Ціханоўскага, Статкевіча і іншых ГЛЯДЗІЦЕ ТАКСАМА: Бацькі Ігара Лосіка ў інтэрвію Свабодзе: «Можна даць і 100 гадоў турмы». ВІДЭА