Міжнародная праваабарончая арганізацыя Amnesty International выступіла з заявай, у якой асудзіла прад’яўленьне новых абвінавачаньняў палітзьняволенай праваабаронцы Марфе Рабковай.
Марфе Рабковай, праваабаронцы і каардынатарцы валянтэрскай службы Праваабарончага цэнтру «Вясна», выставілі новыя абвінавачаньні паводле 11 крымінальных артыкулаў. Ёй пагражае да 20 гадоў зьняволеньня.
ГЛЯДЗІЦЕ ТАКСАМА: Праваабаронцы Марфе Рабковай прад’явілі абвінавачаньне па 11 артыкулах, ёй пагражае да 20 гадоў зьняволеньня«Справа Марфы Рабковай наглядна паказвае жахі, зь якімі ў наш час сутыкаюцца праваабаронцы і наогул грамадзянская супольнасьць Беларусі. За апошнія паўтара года ўрад Аляксандра Лукашэнкі фактычна паставіў па-за законам усю праваабарончую супольнасьць краіны, зьняволіўшы ў турмах паводле надуманых абвінавачаньняў дзясяткі праваабаронцаў і закрыўшы велізарную колькасьць арганізацый грамадзянскай супольнасьці, а таксама адвольна затрымаўшы сотні мірных дэманстрантаў», — заявіла Мары Стразэрс, дырэктарка Amnesty International па Ўсходняй Эўропе і Цэнтральнай Азіі.
Яна падкрэсьліла, што Марфе Рабковай пагражае да 20 гадоў турмы паводле «відавочна неабгрунтаваных і палітычна матываваных абвінавачаньняў, хоць яна толькі змагалася за выкананьне правоў чалавека ў сваёй краіне».
Мары Стразэрс заклікала беларускія ўлады «неадкладна і безумоўна вызваліць ня толькі Марфу Рабкову, але і ўсіх затрыманых ейных калегаў зь „Вясны“, а таксама іншых актывістаў, якіх працягваюць адвольна затрымліваць па ўсёй краіне».
ГЛЯДЗІЦЕ ТАКСАМА: Адлічана з ВНУ праз палітыку, ляўрэатка міжнароднай прэміі. 10 фактаў пра праваабаронцу Марфу Рабкову, якой пагражае да 20 гадоў за кратаміМарфу Рабкову затрымалі 17 верасьня 2020 году. Акрамя яе, паводле расплывіста сфармуляваных абвінавачаньняў арыштавалі яшчэ 6 супрацоўнікаў «Вясны» (вядучая праваабарончая арганізацыя ў Беларусі, заснаваная ў 1996 годзе), дваіх ужо асудзілі да турэмнага зьняволеньня па выніках закрытых судовых працэсаў.
Перасьлед Праваабарончага цэнтру «Вясна»
Па стане на 3 сакавіка 2024 году, за кратамі знаходзяцца 5 праваабаронцаў «Вясны».
- Алесь Бяляцкі, старшыня «Вясны», затрыманы 14 ліпеня 2021. Падчас ягонага зьняволеньня, 7 кастрычініка 2022 году, Алесю Бяляцкаму была прысуджаная Нобэлеўская прэмія міру. 3 сакавіка 2023 году яго асудзілі на 10 гадоў калёніі. Бяляцкага прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Валянцін Стэфановіч, намесьнік старшыні «Вясны» і віцэ-прэзыдэнт FIDH, затрыманы 14 ліпеня 2021-га. 3 сакавіка 2023 году яго асудзілі на 9 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Уладзімер Лабковіч, юрыст «Вясны», затрыманы 14 ліпеня 2021 г. 3 сакавіка 2023 году яго асудзілі на 7 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Марфа Рабкова, праваабаронца «Вясны», затрыманая 17 верасьня 2020 году. Ёй прысудзілі 15 гадоў калёніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, або звыш 8800 даляраў) паводле ч. 3 арт. 293 Крымінальнага кодэксу («навучаньне ці іншая падрыхтоўка асобаў для ўдзелу ў масавых беспарадках, альбо фінансаваньне такой дзейнасьці»), ч. 3 арт. 130 («распальваньне сацыяльнай варожасьці да ўлады») і ч. 2 арт. 285 КК («ўдзел у злачыннай арганізацыі»). 28 лютага 2023 году Вярхоўны суд Беларусі разгледзеў апэляцыйную скаргу ў справе Рабковай. Тэрмін зьняволеньня скарацілі на тры месяцы.
- Андрэй Чапюк, валянтэр «Вясны» зь Менску, затрыманы 2 кастрычніка 2020-га. Яго абвінавачвацілі ва ўдзеле ў масавых беспарадках і ўдзеле ў злачыннай арганізацыі. Чапюка асудзілі на 6 гадоў калёніі ва ўмовах узмоцненага рэжыму і пакаралі штрафам у памеры 500 базавых велічыняў (16 000 беларускіх рублёў ці больш за 6 300 даляраў);
- Леанід Судаленка, дырэктар гомельскага аддзяленьня «Вясны», затрыманы 18 студзеня 2021-га. Паводле артыкулу аб масавых беспарадках яго пакаралі на 3 гады зьняволеньня.
Выйшла на волю:
- Тацьцяна Ласіца, валянтэрка «Вясны» з Гомля, затрыманая 21 студзеня 2021. Паводле артыкулу аб масавых беспарадках за кратамі прабыла 1 год і 8 месяцаў. Праваабаронца не адбыла ўвесь тэрмін.