Асуджаныя ў гучнай крымінальнай справе аб «карагодах» у Берасьці Натальля Шыла і Ільля Ягораў, якія атрымалі па 2,5 года «хіміі», здолелі выехаць з краіны. Цяпер ім нічога не пагражае, піша «Белсат».
13 верасьня 2020 году падчас акцыі пратэсту супраць фальсыфікацыі выбараў сотні берасьцейцаў выйшлі на скрыжаваньне праспэкту Машэрава і бульвару Касманаўтаў, дзе зладзілі карагод. Паводле абвінавачаньня, людзі «дзейнічалі ў групе зь іншымі асобамі, якія на праезнай частцы гучна крычалі, сьвісталі, выгуквалі лёзунгі, пляскалі ў ладкі, наўмысна бралі актыўны ўдзел у групавых дзеяньнях, якія груба парушаюць грамадзкі парадак, перашкаджалі працы транспарту, прадпрыемстваў і арганізацыяў».
Беларускія сілавікі ўжылі супраць жыхароў Берасьця вадамёт — разагналі карагод.
Усяго ў крымінальнай справе праходзілі ці праходзяць падазраванымі дзясяткі чалавек, многія ўжо атрымалі турэмныя тэрміны.
ГЛЯДЗІЦЕ ТАКСАМА: З пружанскай раёнкі сышла рэдактарка. Раней яе сына асудзілі па «карагоднай справе» ГЛЯДЗІЦЕ ТАКСАМА: Да 5,5 года турмы. У Берасьці агучылі выракі яшчэ 19 фігурантам справы аб «масавых беспарадках»