У расейскім горадзе пасьля адмовы прышчапляцца звольніліся ўсе супрацоўнікі хуткай дапамогі

Ілюстрацыйнае фота

Усе супрацоўнікі хуткай дапамогі гораду Аблучча ў Яўрэйскай аўтаномнай вобласьці вырашылі звольніцца з прычыны нежаданьня вакцынавацца ад COVID-19.

Пра гэта паведаміла агенцтва «РИА Новости» са спасылкай на галоўнага санітарнага лекара рэгіёну Паўла Капылова.

Чыноўнік падпісаў пастанову, паводле якой у вобласьці да 15 лістапада трэба прышчапіць ад каранавірусу 80 працэнтаў калектыву. Завяршыць вакцынацыю трэба празь месяц. Калі супрацоўнік адмаўляецца ад прышчэпкі, яго павінны адхіліць ад працы.

ГЛЯДЗІЦЕ ТАКСАМА:

У Нямеччыне і Расеі каранавірусныя антырэкорды

«Кіраўніцтва мы папярэдзілі загадзя, што напішам заяву. Да 15 лістапада будзем працаваць», — растлумачыў агенцтву працаўнік станцыі хуткай дапамогі.

Гэтую інфармацыю пацьвердзіў і галоўны доктар абласной станцыі хуткай дапамогі Ўладзіслаў Коган. Агулам заявы напісалі 15 чалавек.

ГЛЯДЗІЦЕ ТАКСАМА:

«59% апытаных не гатовыя вакцынавацца». Партрэт беларускага антываксэра

У Яўрэйскай аўтаноміі жыве 156,5 тысячы чалавек. З пачатку пандэміі каранавірусу ў рэгіёне зафіксавалі больш за дзевяць тысяч выпадкаў заражэньня COVID-19, памерлі каля 300 пацыентаў. Ложкавы фонд запоўнены амаль на 90 працэнтаў.

ГЛЯДЗІЦЕ ТАКСАМА:

Прэзыдэнтка Грузіі заклікала зрабіць платным лячэньне для непрышчэпленых ад каранавірусу

У аўтаноміі ўведзены абмежаваньні праз пагрозу распаўсюджваньня COVID-19. Для мэдыкаў, выкладчыкаў, работнікаў сфэры паслуг і гандлю ўведзена абавязковая вакцынацыя. Паводле стану на канец кастрычніка, цалкам прышчапіліся крыху больш за 40 тысяч чалавек. Хаця б адну дозу прышчэпкі атрымалі больш за 44 тысячы жыхароў.

ГЛЯДЗІЦЕ ТАКСАМА:

Як адрозьніць грып ад COVID-19. Парады