У Нямеччыне і Расеі каранавірусныя антырэкорды

Колькасьць заражаных каранавірусам за апошнія 24 гадзіны ў Нямеччыне склала 33 949 чалавек. Гэта максымальная лічба інфікаваных за дзень з пачатку пандэміі.

Deutsche Welle паведамляе, што роўна тыдзень таму гэты паказьнік складаў 28 037 выпадкаў. Ранейшы максымум дзённага інфікаваньня ў краіне — 33 777 чалавек — быў зарэгістраваны 18 сьнежня 2020 году.

Тым самым агульная колькасьць зарэгістраваных выпадкаў заражэньня каранавірусам у Нямеччыне ўзрасла да 4 672 368 выпадкаў.

ГЛЯДЗІЦЕ ТАКСАМА:

Як адрозьніць грып ад COVID-19. Парады

Тым часам у Расеі трэці дзень фіксуецца максымум дзённай сьмяротнасьці ад COVID-19 з пачатку пандэміі. Паводле афіцыйнага стану на раніцу 4 лістапада, за 24 гадзіны ад інфэкцыі памерлі 1195 чалавек.

Усяго ў Расеі (уключаючы анэксаваны Крым) памерлі, паводле афіцыйных зьвестак, 243 255 пацыентаў, у якіх была пацьверджана каранавірусная інфэкцыя. Незалежныя дэмографы лічаць, што сьмяротнасьць заніжаецца прыблізна ў тры разы. Гэта азначае, што ў рэальнасьці з пачатку пандэміі ў Расеі памерлі звыш 700 тысяч чалавек.