Палітвязьні

Сьледзтва адмовілася зьмяніць меру стрыманьня для Андрэя Скурко

Андрэй Скурко, архіўнае фота

Бацькі супрацоўніка «Нашай нівы» Андрэя Скурко зьвярнуліся да сьледзтва з просьбай зьмяніць меру стрыманьня для сына. Пажылыя і хворыя людзі засталіся без дапамогі.

У заяве яны згадалі, што ў Андрэя інсуліназалежны цукровы дыябэт, а турэмныя ўмовы ды адсутнасьць дыеты нішчаць ягонае здароўе. Акрамя таго, бяз бацькі расьце паўтарагадовы сын.

ГЛЯДЗІЦЕ ТАКСАМА: «Дужыя, разумныя людзі вымушаныя гуляць у словы». Як жыве ў няволі журналіст Андрэй Скурко

Аднак сьледзтва адмовіла ў задавальненьні хадайніцтва. Вось які адказ атрымалі бацькі Андрэя Скурко.

«Сабраныя ў крымінальнай справе доказы даюць дастатковыя падставы меркаваць, што абвінавачаны можа схавацца ад органу крымінальнага перасьледу, перашкодзіць папярэдняму расьсьледаваньню, у тым ліку шляхам аказаньня незаконнага ўзьдзеяньня на асобаў, якія ўдзельнічаюць у працэсе, утойваньня ці фальсыфікацыі матэрыялаў, якія маюць значэньне для справы, не зьявіцца без важных прычынаў па выкліку ў орган, які вядзе крымінальны працэс», — гаворыцца ў лісьце.

ГЛЯДЗІЦЕ ТАКСАМА: Галоўнаму рэдактару «Нашай Нівы» адмовілі ў спатканьні са сваякамі, хадайніцтва аб зьмене меры стрыманьня адхілілі

Раней сьледзтва з аналягічных прычынаў адмовілася выпусьціць зь СІЗА пад асабістае паручальніцтва галоўнага рэдактара «Нашай нівы» Ягора Марціновіча.

Абодва супрацоўнікі незалежнага мэдыя прызнаныя палітычнымі вязьнямі.

Справа «Нашай Нівы»

  • Чатырох «нашаніўцаў» затрымалі 8 ліпеня 2021 году: галоўнага рэдактара сайту «Наша Ніва» Ягора Марціновіча, галоўную бухгальтарку «Нашай Нівы» Вольгу Раковіч, рэдактара часопіса «Наша гісторыя», дзіцячых часопісаў «Асьцярожна, дзеці!» і «Дуду» Андрэя Дынько і кіраўніка аддзелу рэклямы і маркетынгу Андрэя Скурко.
  • Марціновіча пры затрыманьні білі па галаве. Яму выклікалі «хуткую».
  • «Нашаніўцаў» затрымлівалі спачатку ў межах крымінальнай справы аб «арганізацыі дзеяньняў, якія груба парушаюць грамадзкі парадак (ч. 1 арт. 342 КК Беларусі).
  • Паўторна іх затрымалі за тое, што камунальныя паслугі ў памяшканьні рэдакцыі яны плацілі паводле тарыфаў для фізычных асобаў, а трэба было як для юрыдычных. Пазыка склала 3500 рублёў. Марціновічу і Скурко выставілі абвінавачаньне ў нанясеньні маёмаснай шкоды без прыкметаў раскраданьня (ч. 2 арт. 216 КК). Ім пагражае «хімія» або калёнія тэрмінам да 5 гадоў.
  • Раковіч і Дынько выпусьцілі цягам двух тыдняў пасьля затрыманьня. Пад вартай застаюцца Марціновіч і Скурко.
  • Скурко хварэе на інсуліназалежны дыябэт. Да таго ж за кратамі ў яго дыягнаставалі пнэўманію.
  • Доступ да сайту «Нашай Нівы» зьнік 8 ліпеня, 29 ліпеня сайт nashaniva.com аднавіў працу. Рэдакцыя цяпер працуе з-за мяжы.