Новым прэзыдэнтам Эстоніі стаў дырэктар Нацыянальнага музэю

За кандыдатуру Алара Карыса было аддадзена 72 галасы з 68 неабходных. Восем бюлетэняў былі пустымі, ніводзін не прызнаны несапраўдным.

Карыс ад самага пачатку быў адзіным кандыдатам у прэзыдэнты, вылучаным ад кааліцыйных партый — Партыі рэформаў і Цэнтрысцкай партыі.

У першым туры галасаваньня (з трох магчымых), які адбыўся 30 жніўня, яму не хапіла пяці галасоў супраць 2/3 ад агульнай колькасьці. Кааліцыйныя палітычныя сілы разам маюць усяго 59 галасоў.

63-гадовы Алар Карыс — біёляг (малекулярная генэтыка), былы дзяржаўны кантралёр, рэктар Унівэрсытэту прыродазнаўства і Тартускага ўнівэрсытэту, ад кастрычніка 2017 году ўзначальвае Нацыянальны музэй Эстоніі. Карыс ніколі ня быў сябрам ніякай палітычнай партыі, што лічыцца яго перавагай.

Ранейшая прэзыдэнтка краіны Керсьці Кальюлайд сустракалася са Сьвятланай Ціханоўскай, якую назвала «лідэрам беларускага народу» і паабяцала ёй, што падчас свайго прэзыдэнцтва ў Радзе Бясьпекі ААН Эстонія зробіць усё, каб «падымаць тэму Беларусі і максымальна ўзьдзейнічаць на рэжым Лукашэнкі і яго памагатых».