Жаўнеры памежнай службы Польшчы і вайскоўцы іншых падразьдзяленьняў затрымалі на мяжы зь Беларусьсю 13 чалавек. Памежная варта краіны паведаміла, што ў групу ўваходзілі 12 палякаў і адзін галяндзец, яны разбуралі агароджу, якая ўзводзіцца на мяжы зь Беларусьсю.
Funkcjonariusze SG wspólnie z żołnierzami WP zatrzymali grupę 13 osób(12 ob.🇵🇱i 1 ob.🇳🇱), które zniszczyły zapory techniczne na granicy🇵🇱-🇧🇾. Wśród zatrzymanych jest Bartosz K. Trwają czynności zmierzające do postawienia tym osobom zarzutów. #NaStraży pic.twitter.com/kDMFwO8fJl
— Straż Graniczna (@Straz_Graniczna) August 29, 2021
Праводзяцца сьледчыя дзеяньні з мэтай прад’яўленьня абвінавачаньняў названай групе асоб, паведамляе DW.
Міністар унутраных спраў і адміністрацыі Польшчы Марыюш Каміньскі назваў сытуацыю на мяжы «абсалютна непрымальнай». Па словах міністра, парушальнікі панясуць крымінальнае пакараньне.
«Мы будзем рэагаваць на падобныя дзеяньні з поўнай рашучасьцю», — падкрэсьліў Каміньскі.
Sytuacja, do której doszło na naszej granicy, jest absolutnie niedopuszczalna. Sprawcy, którzy przerwali ogrodzenie zostali zatrzymani przez Straż Graniczną i poniosą wszelkie konsekwencje karne swoich działań. Na podobne akty będziemy reagować z pełną stanowczością.
— Mariusz Kamiński (@Kaminski_M_) August 29, 2021
Раней Польшча заявіла, што ўзьвядзе на мяжы зь Беларусьсю плот вышынёй 2,5 мэтра, каб бараніцца ад мігрантаў, якіх афіцыйны Менск дастаўляе адмыслова. Варшава, як і кіраўніцтва краінаў Балтыі, вінаваціць Лукашэнку ў гібрыднай атацы з дапамогай мігрантаў.
Латвія і Літва заканадаўча пашырылі паўнамоцтвы вайскоўцаў пры ахове дзяржаўнай мяжы, у Літве, акрамя таго, заявілі пра пабудову плоту. Неўзабаве гэтую ідэю ўзяла на ўзбраеньне і Польшча. У Латвіі тым часам павялічылі турэмны тэрмін за незаконны пераход дзяржаўнай мяжы.
У апошнія тыдні суседнія зь Беларусьсю краіны спрабуюць не затрымліваць мігрантаў, якія хочуць парушыць дзяржаўную мяжу, а проста адпраўляюць іх назад у Беларусь. Афіцыйны Менск вінаваціць Вільню, Варшаву і Рыгу ў кепскім абыходжаньні зь мігрантамі і парушэньні міжнародных законаў, а суседнія краіны заяўляюць, што мігранты зьяўляюцца толькі зброяй у руках Лукашэнкі, якой ён хоча дамагчыся сваіх палітычных мэтаў.
ГЛЯДЗІЦЕ ТАКСАМА: «ЦэнтарКурорт» абвяргае датычнасьць да перапраўкі мігрантаў і «наогул спыніў прыём турыстаў з Іраку» ГЛЯДЗІЦЕ ТАКСАМА: За дзень у Эўразьвяз зь Беларусі спрабавалі трапіць 322 мігранты. Сямʼя ўцекачоў расказала, што ў Беларусі ў іх забралі пашпарты