У Менск з Багдада чатыры разы на тыдзень прылятае вялікі авіялайнэр. Хто сустракае пасажыраў і што адбываецца з гэтымі людзьмі далей?
Ад пачатку траўня ўлады Літвы пачалі паведамляць, што на мяжы зь Беларусьсю складваецца небясьпечная сытуацыя. Колькасьць уцекачоў з Іраку і Сырыі, якія спрабуюць нелегальна трапіць у Літву зь Беларусі, павялічылася шматкроць. Пры гэтым літоўскі бок прама абвінавачвае сваіх беларускіх калег у бязьдзеяньні.
ГЛЯДЗІЦЕ ТАКСАМА: «Чакаем рэйсу Багдад — Менск», – кіраўнік літоўскіх памежнікаў пра паток нелегалаў зь БеларусіДнямі агенцтва БелТА са спасылкай на Дзяржаўны памежны камітэт Беларусі паведаміла, што «з пачатку бягучага года адзначаецца істотны рост колькасці мігрантаў, якія робяць спробы незаконна патрапіць у краіны Эўразьвязу». Паводле іх, на мяжы зь Літвой колькасьць затрыманых нелегальных мігрантаў вырасла практычна ў 20 раз.
З траўня рэйсаў стала ўдвая болей
Абвастрэньне на мяжы супала з павелічэньнем колькасьці прамых авіярэйсаў з Багдада ў Менск. З 2017 году ў Беларусь з Іраку двойчы на тыдзень робіць рэйсы авіякампанія Iraqi Airways. На пачатку траўня 2021 году да яе дадалася яшчэ адна — Fly Baghdad. Яе самалёты таксама прылятаюць у Беларусь два разы на тыдзень — па панядзелках і чацьвяргах (Iraqi Airways выконвае рэйсы па панядзелках і пятніцах).
Абодва перавозчыкі выкарыстоўваюць даволі вялікія авіялайнэры. Fly Baghdad лятае ў Менск на Boeing 737-800, які зьмяшчае каля 200 пасажыраў. Iraqi Airways увогуле выкарыстоўвае адну з мадыфікацый Boeing 777 — шырокафюзэляжнага лайнэра, які, у залежнасьці ад камплектацыі, можа зьмясьціць каля трох соцень чалавек. Гэта адзін з самых вялікіх пасажырскіх самалётаў, якія на гэты момант выконваюць рэгулярныя рэйсы ў Беларусь.
Абедзьве авіякампаніі прылятаюць у Менск каля 13:30.
Што мы пабачылі ў аэрапорце
У сераду 16 чэрвеня рэйс з Багдада прызямліўся ў Беларусі разам з чартэрам «Белавія» з Антальлі. Пасажыраў з Іраку сустракалі арганізавана. Для сустрэчы іракцаў ля выхаду з тэрміналу арганізавалі стойку, дзе пасажыраў багдадскага рэйсу адзначаюць у адмысловых сьпісах. Стойка пазначаная лягатыпамі кампаній Oscartur i JoodLand.
Кожнаму з турыстаў (гэта выключна мужчыны ва ўзросьце 30-50 гадоў, прыстойна апранутыя, зь вялікімі валізкамі) пры сустрэчы выдаюць бутэльку вады, а таксама невялікі прэзэнт — загорнуты ў бліскучую абгортку слоік мёду.
Пасьля адзначэньня пасажыраў з Багдаду тыя, хто сустракае, накіроўваюць іх у абменны пункт на другім паверсе аэрапорту, а адтуль арганізавана вывозяць аўтобусамі ў Менск.
16 чэрвеня два з такіх аўтобусаў адвезьлі каля сотні мужчын у менскі гатэль «Рэнэсанс». Усе яны выходзілі з аўтобусаў са сваім багажом каля чорнага ўваходу ў гатэль.
Што вядома пра туркампаніі, які прымаюць пасажыраў з Іраку
Інфармацыі пра кампаніі Oscartur i JoodLand у адкрытым доступе няшмат. Першая зь іх мае профілі ў Instagram і Facebook з 300 і 3800 падпісчыкамі адпаведна. У гэтых сацсетках пазначана, што Oscartur займаецца арганізацыяй турыстычных паездак з Іраку ў Беларусь. Пры гэтым пасты і фатаздымкі ня маюць вялікай колькасьці ўпадабаньняў, у інстаграме Oscartur можна пабачыць толькі 28 пастоў, большасьць зь якіх была зробленая яшчэ ў 2017 годзе. У якасьці кантактаў Oscartur пазначана паштовая скрыня на расейскім сэрвісе mail.ru, а таксама беларускі мабільны нумар.
У сацсетках кампаніі JoodLand падпісчыкаў значна больш, каля 40 тысяч толькі на фэйсбуку. JoodLand базуецца ў Багдадзе, займаецца арганізацыяй паездак у вялікую колькасьць краін, у тым ліку ў Расею.
Паводле інфармацыі тэлеграм-каналу «Мотолько Помоги» у сераду 16 чэрвеня турысты з Іраку таксама прыбывалі ў іншыя гатэлі Менску. У тым ліку дзяржаўныя — «Беларусь» і «Юбілейная».
Радыё Свабода праз тэлефон зьвярнулася ў кампанію Oscartur па камэнтар. «Не званіце сюды болей. (Далей нецэнзурна — РС.)», — адказалі па нумары, пазначаным на старонках сацсетак кампаніі.
ГЛЯДЗІЦЕ ТАКСАМА: Літва зьбіраецца адгарадзіцца ад Беларусі плотамЯкія зносіны ў Беларусі з Іракам
Гандлёвыя зносіны паміж Беларусьсю і Іракам застаюцца на нізкім узроўні, статыстыка гандлю таварамі і паслугамі паміж абедзьвюма краінамі нават не трапляе ў штогадовыя зборнікі Белстату. Пры гэтым яна адлюстроўвае, напрыклад, гандаль з Малаві, Парагваем і шэрагам іншых краін, таваразварот зь якімі ў Беларусі каля 1,5 мільёна даляраў.
Па зьвестках Нацыянальнага цэнтру маркетынгу і каньюнктуры цэнаў МЗС Беларусі, па стане на 2017 год таваразварот паміж краінамі складаў каля 27 мільёнаў даляраў. Пры гэтым увесь абарот прыпадаў на пастаўкі тавараў і паслуг зь Беларусі. Больш за 90% экспарту Іраку прыпадае на нафту і нафтапрадукты. Зьвестак пра закупкі Беларусьсю ірацкіх энэрганосьбітаў пакуль не было.
Паміж краінамі таксама няма непасрэдных дыпляматычных зносін — Ірак у Менску прадстаўляе пасол у Расеі. У Багдадзе дзейнічае толькі ганаровае консульства Беларусі. Адзіная публічная інфармацыя аб афіцыйных кантактах паміж прадстаўнікамі МЗС Беларусі і Іракам вясной 2021 году датычылася магчымага разьвіцьця сфэры турызму і адукацыі.
ГЛЯДЗІЦЕ ТАКСАМА: Міністар замежных спраў Літвы: Беларусь выкарыстоўвае нелегальных мігрантаў як зброю