У Яўгеніі Чарняўскай ёсьць здагадка, што маці знаходзіцца ў СІЗА КДБ, піша яна ў Фэйсбуку, але адвакатцы адмовіліся даць канкрэтную інфармацыю. Усе, хто бачыў Юлію Чарняўскую ў апошнія суткі, на сувязь не выходзяць.
«Відавочна, нешта падпісалі і ня маюць права даваць ніякіх дэталяў, і вельмі запалоханыя, бо акрамя „мама ў парадку“, ніякай інфармацыі мне ці бабулі не паступала».
Таксама дачка ня ведае, дзе маці правяла ноч, у якім стане яе здароўе цяпер. Юлія Чарняўская — інвалід, апошнія 10 гадоў пакутуе на моцны боль у хрыбетніку і нагах.
«Большую частку дня яна праводзіць лежачы ў ложку, працуе таксама лежачы за ноўтбукам, бо сядзець і хадзіць ёй вельмі балюча. Таксама ў яе сур’ёзныя праблемы з сэрцам, і па сьведчаньнях відавочцаў, учора яна перанесла гіпэртанічны крыз, пасьля чаго была дастаўлена ў лякарню пад канвоем, і пад канвоем жа была выпісана».
Таксама Яўгенія Чарняўская падкрэсьлівае, што ў яе маці няма ніякай інфармацыі аб дзейнасьці Tut.by, не зьяўляецца яго акцыянэрам, ня ў курсе ўнутраных працэсаў, і ўжо дакладна нічога ня ведае аб фармальнай прэтэнзіі, якую выкарыстала пракуратура, «каб зладзіць маскі-шоу у „Тут Бай мэдыя“ — „Выкарыстаньне ПВТ для ўхіленьня ад падаткаў“».
Для дачкі відавочна, што яе маці выкарыстоўваюць сілавыя органы, каб ціснуць на Tut.by. Акрамя таго, апошнія месяцы быў ціск на акцыянэраў парталу і сям’ю памерлага год таму заснавальніка Зісера з мэтай атрыманьня кантролю над дзейнасьцю Tut.by. Дачка згадала «дзіўныя паведамленьні з розных каналаў сувязі» ёй і яе калегам.
«Сёньня маму ўтрымліваюць як закладніцу, запалохваюць яе і аказваюць ціск. Ладзяць інфармацыйную блякаду, каб дэзарыентаваць, прымусіць адчуваць сябе разгубленай і не пускаюць да яе адваката», — дадала Яўгенія Чарняўская.
Раніцай 18 траўня да некалькіх рэдактараў Tut.by дадому прыйшлі сілавікі. Камітэт Дзяржкантролю паведаміў, што ў адносінах да службовых асоб ААТ «Тут Бай мэдыя» пачата крымінальная справа паводле ч.2 арт.243 КК (ухіленьне ад сплаты падаткаў у асабліва буйным памеры). Нібыта з 2019 году, калі ААТ стала рэзыдэнтам Парку высокіх тэхналёгіяў, была атрымана выручка, «не абумоўленая дзейнасьцю, дазволенай для рэзыдэнтаў ПВТ».
ГЛЯДЗІЦЕ ТАКСАМА: «Справа Tut.by»: што вядома на сёньня ГЛЯДЗІЦЕ ТАКСАМА: Невядома, дзе ўдава заснавальніка Tut.by Юлія Чарняўская: ні дома, ні ў шпіталі няма