У Барысаве ўвечары 3 траўня зьбілі і затрымалі лекара-нэўроляга Аляксандра Цялегу. Апошнія гады Цялега жыў і працаваў у Расеі, але часам прыяжджаў у Барысаў да бацькоў. Цяпер ён таксама быў там, але нечакана зьнік, піша «Наша Ніва».
Першым пра затрыманьне Цялегі паведаміў тэлеграм-канал «Белые халаты. News». Ён напісаў, што нэўроляга пасьля зьбіцьця і затрыманьня ў Барысаве літаральна ў сподняй бялізьне даставілі ў СІЗА Горадні. Міліцыя пакуль не пацьвердзіла гэтага.
Цялега актыўна выказваўся ў сацыяльных сетках пра сытуацыю ў Беларусі. Калегі мяркуюць, што яго маглі затрымаць праз допісы ў інтэрнэце.
4 траўня ў Менску затрымалі сківічнага хірурга Андрэя Любецкага, які таксама актыўна выказваўся пра становішча ў краіне. Ягоная жонка Натальля — стаматоляг. Яна страціла працу пасьля сюжэту на АНТ, дзе расказвалі пра яе дапамогу Ігару Макару. Некалькі дзён таму Натальля разам з чатырма дзецьмі зьехала за мяжу, а Андрэй застаўся ў Беларусі.
ГЛЯДЗІЦЕ ТАКСАМА: Затрымалі вядомага хірурга Андрэя Любецкага, сямʼя якога пакінула Беларусь ГЛЯДЗІЦЕ ТАКСАМА: У Кобрынскай лякарні пэдыятра звальняюць за «суткі» ў ізалятары, хоць законапраект, які гэта дазваляе, яшчэ не ўступіў у сілу