Заблякаваны ў Беларусі сайт kyky.org просіць дапамогі праз Patreon. Што гэта такое?

Беларускі сайт kyky.org, дамэны якога ўлады Беларусі блякавалі ўжо ня менш як восем разоў, запусьціў рахунак на Patreon, дзякуючы якому чытачы могуць атрымаць падарункі і выгадныя прапановы ад інтэрнэт-рэсурсу. Варта толькі падтрымаць каманду рэдакцыі.

Як адзначыла рэдакцыя Kyky, раней сайт пісаў пра ўсё, што хвалюе беларусаў — пра прадпрымальнікаў, кандыдатаў у прэзыдэнты, каранакрызіс і культуру. Але пасьля 9 жніўня 2020 году на парадку дня дваровыя маршы, ператрусы, затрыманьні, ізалятары, крымінальныя справы і суды.

З канца жніўня рэдакцыя знаходзіцца не ў Беларусі, сайт на радзіме заблякаваны, а рахункі — арыштаваныя.

Сузаснавальнік сайта Аляксандар Васілевіч сядзіць у турме. 4 верасьня Васілевічу і ягонай жонцы Надзеі Зелянковай выставілі абвінавачаньне ў крымінальным злачынстве. Ён пад вартай у СІЗА № 1 Менску, яна на волі. У чым іх абвінавачваюць, афіцыйна невядома, адвакатка дала падпіску аб невыдаваньні.

Што дае плятформа Patreon?

Patreon — пляцоўка для збору грошай грамадой дзеля працягу працы рэдакцыі, блогу альбо ініцыятывы. Пляцоўка працуе як онлайн-крама: на рахунку арганізацыі разьмяшчаюцца лоты, на якія можна аформіць падпіску, ахвяраваўшы грошы. За гэта ахвярадаўца атрымлівае прадукты і паслугі, прадугледжаныя замоўленым лотам.

У якасьці лотаў рэдакцыя kyky.org прапанавала рэчы з дызайнам ад таленавітых беларусаў:

• прынт на майках — праца ўжо легендарнага Ўладзімера Цэсьлера
• шопэр, аформлены артам Базыля Стахіевіча, чыя скульптура стала фішкай менскай Кастрычніцкай
• постэр — праца Караліны Паляковай
• стыкер, зроблены на аснове работаў Антона Snt

5 рэжымаў падтрымкі падзеленыя ў залежнасьці ад сумы ахвяраваньня, ад 5 да 100 эўра. У апошнім рэжыме, які называецца «Таемны мэцэнат», чалавек можа падтрымаць таксама й рэдакцыю The Village Беларусь, якая знаходзіцца ў адным мэдыяхолдынгу з kyky.org і таксама зазнала блякаваньне сайта і арышт рахункаў.