Павал Латушка ў лісьце зьвярнуўся да інвэстыцыйных фондаў, якія перад выбарамі купілі беларускія эўрабонды на 1,2 млрд даляраў.
«Грошы з продажу эўрабондаў пайшлі не на рэфінансаваньне зьнешняга доўгу, як гэта было заяўлена ў праекце эмісіі, а на рэпрэсіі супраць беларускага народу. Да таго ж, на момант эмісіі бондаў у Беларусі ўжо парушалі законы і правы чалавека: саджалі патэнцыйных кандыдатаў у прэзыдэнты ў турмы, разганялі мірныя дэманстрацыі, не дапускалі незалежных людзей у склад участковых выбарчых камісій».
Нацыянальнае антыкрызіснае кіраўніцтва хоча, каб інвэстыцыйныя фонды прад’явілі свае эўрабонды да датэрміновага пагашэньня і вярнулі сабе грошы.
Улетку 2020 году 27 інвэстыцыйных фондаў зь Вялікай Брытаніі, Францыі, Швайцарыі, ЗША і іншых краін купілі беларускія эўрабонды. Іх разьмяшчэньнем на рынку бондаў займаліся тры інвэстбанкі: Societe Generale, Citibank і Raiffeisen. Сярод фондаў, якія купілі эўрабонды, шмат вядомых кампаній: Raiffeisen Bank International AG, Deutsche Bank, Goldman Sachs, Morgan Stanley і іншыя.
ГЛЯДЗІЦЕ ТАКСАМА: Латушка: больш за 1000 беларускіх чыноўнікаў згадзіліся падпісаць ліст аб адстаўцы Лукашэнкі ГЛЯДЗІЦЕ ТАКСАМА: Ціханоўская назвала «насьмешкай» санкцыі Эўразьвязу супраць кіраўніцтва Беларусі