Сіманаўскі суд Масквы на выязным пасяджэньні ў будынку Маскоўскага гарадзкога суду замяніў расейскаму апазыцыянэру Аляксею Навальнаму ўмоўны прысуд 3,5 года турмы на рэальны тэрмін у калёніі агульнага рэжыму. Тэрмін будзе паменшаны на 10 месяцаў, якія падсудны адбыў пад хатнім арыштам.
Радыё Свабода і тэлеканал «Настоящее время» вялі жывую трансьляцыю.
Напярэдадні маскоўскае ўпраўленьне МУС Расеі паведаміла, што перакрые некалькі вуліц, якія вядуць да будынку Маскоўскага гарадзкога суду. Штаб палітыка заклікаў прыхільнікаў прыйсьці і падтрымаць Навальнага. З раніцы аўторка супрацоўнікі АМАПу сталі ланцужком перад пешаходным пераходам каля брамы будынка, перадае «Новая газета». Дакумэнты правяраюць яшчэ на выхадзе з суседняй станцыі мэтро.
ГЛЯДЗІЦЕ ТАКСАМА: У Расеі прайшлі акцыі пратэсту ў абарону Аляксея Навальнага, затрымалі больш за 4000 чалавек