Пра гэта паведамляе «Голас Амэрыкі», адзначаючы, што абмеркаваньне пытаньня выдачы дазволу заняло ў камітэту дзевяць гадзінаў.
З 22 чалавек, якія ўваходзяць у склад згаданага камітэту FDA, 17 прагаласавалі «за», чатыры — «супраць» і адзін устрымаўся, адказваючы на наступнае пытаньне: «На падставе сукупнасьці наяўных навуковых зьвестак аб вакцыне супраць COVID-19 вытворчасьці Pfizer/BioNTech ці, на вашу думку, перавагі вакцыны большыя за яе рызыкі пры выкарыстаньні для людзей ва ўзросьце 16 гадоў і старэйшых?».
ГЛЯДЗІЦЕ ТАКСАМА: ЗША зрабілі яшчэ крок да зацьвярджэньня вакцыны супраць COVID-19Як чакаецца, з гэтай экспэртнай рэкамэндацыяй FDA, хутчэй за ўсё, выдасьць канчатковую згоду на выкарыстаньне вакцыны ўжо 11 або 12 сьнежня. Тады фэдэральныя ўлады ЗША неадкладна адправяць 6,4 мільёна дозаў вакцыны ва ўсе куткі краіны, пры гэтым найперш мэдычным работнікам, якія працуюць зь людзьмі, заражанымі каранавірусам.
Між тым у ЗША працягваюць фіксаваць рэкордную колькасьць новых выпадкаў заражэньняў COVID-19. Паводле зьвестак Ўнівэрсытэту Джонза Гопкінза, станам на вечар 11 сьнежня ў ЗША было зарэгістравана 15,5 мільёна выпадкаў заражэньняў і больш за 291 тысячу сьмерцяў у выніку ўскладненьняў ад каранавірусу.
ГЛЯДЗІЦЕ ТАКСАМА: Канада ўхваліла вакцыну BioNTech / Pfizer ад каранавірусуСпачатку вакцынацыя ў ЗША будзе добраахвотнай, але можа стаць абавязковай пасьля таго, як прэпарат атрымае паўнавартасную ліцэнзію на выкарыстаньне.
Вакцына Pfizer/BionTech стала адной зь першых сярод дзясяткаў падобных прэпаратаў, якія распрацоўваюцца цяпер навукоўцамі па ўсім сьвеце, ухваленай для выкарыстаньня ў шэрагу краін. 8 сьнежня Вялікая Брытанія стала першай заходняй краінай, якая распачала масавую вакцынацыю з дапамогай гэтага прэпарату.
ГЛЯДЗІЦЕ ТАКСАМА: Вялікая Брытанія ўхваліла вакцыну BioNTech / Pfizer і першай у сьвеце пачне вакцынацыю ад каранавірусу