Шэсьць краін – Альбанія, Ісьляндыя, Ліхтэнштэйн, Нарвэгія, Паўночная Македонія і Чарнагорыя – далучыліся да другога пакету санкцый Эўразьвязу супраць высокіх беларускіх чыноўнікаў, гаворыцца ў заяве офісу Вярхоўнага прадстаўніка ЭЗ па вонкавых справах і палітыцы бясьпекі Жузэпа Бурэля.
Альбанія, Паўночная Македонія і Чарнагорыя – кандыдаты на далучэньне да Эўразьвязу, а Ісьляндыя, Ліхтэнштэйн і Нарвэгія ўваходзяць у Эўрапейскую асацыяцыю свабоднага гандлю.
ГЛЯДЗІЦЕ ТАКСАМА: Эўрапарлямэнт правядзе 26 лістапада тэрміновыя дэбаты па Беларусі. Абмяркуюць забойства Рамана Бандарэнкі2 кастрычніка Эўразьвяз увёў санкцыі супраць 40 беларускіх чыноўнікаў — кіраўнікоў і старшых афіцэраў МУС, КДБ, чальцоў ЦВК, былога генэральнага пракурора. 6 лістапада сьпіс быў пашыраны, у яго дадалі яшчэ 15 чыноўнікаў. У сьпіс дадаліся:
- Аляксандар Лукашэнка
- Віктар Лукашэнка — памочнік прэзыдэнта па нацыянальнай бясьпецы
- Ігар Сергеенка — кіраўнік адміністрацыі прэзыдэнта
- Іван Тэртэль — старшыня КДБ
- Раман Мельнік — начальнік Галоўнай управы аховы правапарадку і прафіляктыкі МУС
- Іван Наскевіч — старшыня Сьледчага камітэту
- Аляксей Волкаў — былы першы намесьнік старшыні Сьледчага камітэту, цяпер старшыня Дзяржаўнага камітэту судовых экспэртызаў
- Сяргей Аземша — намесьнік старшыні Сьледчага камітэту
- Андрэй Смаль — намесьнік старшыні Сьледчага камітэту
- Андрэй Паўлючэнка — кіраўнік Апэратыўна-аналітычнага цэнтру пры прэзыдэнце
- Ігар Бузоўскі — намесьнік міністра інфармацыі
- Натальля Эйсмант — прэс-сакратарка прэзыдэнта
- Сяргей Зубкоў — камандзір групы «Альфа» (спэцназ)
- Андрэй Раўкоў — былы дзяржаўны сакратар Рады бясьпекі
- Пётра Міклашэвіч — старшыня Канстытуцыйнага суду
Прычынамі санкцыяў сталі рэпрэсіі і запалохваньне мірных дэманстрантаў пасьля прэзыдэнцкіх выбараў 2020 году, у прыватнасьці — адвольныя арышты і жорсткае абыходжаньне, у тым ліку катаваньне, а таксама запалохваньне журналістаў і гвалт над імі. Таксама — парушэньні правілаў прэзыдэнцкіх выбараў, невыкананьне асноўных міжнародных стандартаў справядлівасьці і празрыстасьці выбараў, фальсыфікацыя вынікаў выбараў, адхіленьне на ўяўных падставах ад выбарчай кампаніі апазыцыйных кандыдатаў, стварэньне абмежаваньняў для назіральнікаў на выбарчых участках, перадузятае фармаваньне выбарчых камісіяў.