Футбольныя заўзятары Ўкраіны ад жніўня праводзяць акцыі салідарнасьці зь Беларусьсю, прыходзячы на матчы сваіх улюбёных камандаў зь беларускай атрыбутыкай.
Найчасьцей гэта бел-чырвона-белы сьцяг або расьцяжка з надпісам «Жыве Беларусь!».
Сваю падтрымку і салідарнасьць зь беларусамі, якія ўжо амаль два месяцы выходзяць на мірныя акцыі пратэсту супраць фальсыфікацыі выбараў, выказваюць заўзятары камандаў, якія ўваходзяць як у прэм’ер-лігу, так і першую лігу.
Футбольныя заўзятары праводзяць свае акцыі, нягледзячы на ўведзеныя абмежаваньні ў сувязі з пандэміяй каранавірусу. Ва Ўкраіне мінулы футбольны сэзон быў скарочаны, а потым праходзіў без прысутнасьці гледачоў. Толькі ў верасьні Міністэрства здароўя Ўкраіны дазволіла частковую прысутнасьць гледачоў на міжнародных матчах, якія адбываюцца на ўкраінскай тэрыторыі.
16 жніўня заўзятары роўненскай каманды «Верес» (першая ліга) зрабілі вялікую расьцяжку з надпісам «Змагайцеся — пераможаце» (беларускі пераклад закліку «Борітеся — поборете!» з паэмы Тараса Шаўчэнкі «Каўказ»).
Фанаты футбольнага клюбу «Альянс» (першая ліга) з гораду Ліпавая Даліна Сумскай вобласьці на ўсе апошнія матчы сваёй каманды прыходзяць з плякатам «Жыве Беларусь».
Заўзятары каманды «Металіст Харків» (першая ліга) на матчы 5 верасьня зладзілі фаер-шоў у патрымку Беларусі зь бел-чырвона-белым сьцягамі і гербам «Пагоня».
Заўзятары каманды «Миколаїв» (першая ліга) на пачатку матчу выконваюць гімн Украіны, а на трыбуне павесілі бел-чырвона-белы сьцяг.
Ультрас кіеўскай каманды «Оболонь» (першая ліга) разам з сымболікай свайго фан-клюбу расьцягнулі плякат з надпісам «Жыве Беларусь!».
Заўзятары чарнігаўскага клюбу «Десна» (прэм’ер-ліга) 22 жніўня прыйшлі на матч сваёй каманды зь бел-чырвона-белым сьцягам.
Ультрас клюбу «Шахтар» (прэм’ер-ліга) прынесьлі ў свой сэктар на матч сваёй каманды 20 верасьня бел-чырвона-белы сьцяг і плякат з надпісам «За нашу і вашу свабоду».
ГЛЯДЗІЦЕ ТАКСАМА: «Лукашэнка выбраў Расею. І гэта азначае канфрантацыю». Кіраўнік МЗС Украіны пра адносіны зь Беларусьсю ГЛЯДЗІЦЕ ТАКСАМА: У Кіеве п’есу Курэйчыка пра жнівеньскія падзеі віталі: «Жыве Беларусь!»