Аляксандар Лукашэнка прыбыў з рабочым візытам у Расею.
Самалёт Лукашэнкі зрабіў пасадку ў аэрапорце гораду Сочы, інфармуе дзяржаўнае агенства БелТА.
У Сочы адбудзецца сустрэча Лукашэнкі з прэзыдэнтам Расеі Ўладзімірам Пуціным.
Перамовы пройдуць у фармаце «сам-насам», падпісаньне дакумэнтаў не заплянаванае.
Прэсавая служба Пуціна інфармуе, што ў ходзе перамоў «маецца на ўвазе абмеркаваньне ключавых пытаньняў далейшага разьвіцьця расейска-беларускіх адносін стратэгічнага партнэрства і саюзьніцтва. Асаблівую ўвагу плянуецца ўдзяліць рэалізацыі буйных сумесных праектаў у гандлёва-эканамічнай, энэргетычнай і культурна-гуманітарнай галінах, а таксама пэрспэктывам прасоўваньня інтэграцыйных працэсаў у рамках саюзнай дзяржавы».
Паводле прэсавай службы Лукашэнкі, бакі «абмяркуюць стан і пэрспектывы разьвіцьця двухбаковага супрацоўніцтва ў розных сфэрах, тэматыку саюзных адносін, разгледзяць міжнародную праблематыку і сытуацыю ў рэгіёне, пытаньні сумеснага рэагаваньня на выклікі».