У Францыі аднавіліся акцыі пратэсту так званых «жоўтых камізэлек» — спантаннага антыўрадавага руху, які ўзьнік у канцы 2018 года. Удзельнікі маніфэстацый носяць жоўтыя сьвятлоадбівальныя камізэлькі.
Суботнія акцыі пратэсту ў Парыжы і іншых гарадах аднавіліся пасьля летніх адпачынкаў. 12 верасьня ў Парыжы былі зачыненыя дзясяткі станцыяў мэтро. Паліцыя затрымала дзясяткі пратэстоўцаў.
Пасьля папярэджаньня парыскай паліцыі аб забароне акцый у раёне Елісэйскіх палёў, Елісэйскага палаца, будынку Нацыянальнага сходу і рэзыдэнцыі кіраўніка ўраду, пратэстоўцы прызначылі збор удзельнікаў у некалькіх іншых месцах, у прыватнасьці, каля базылікі Сакрэ-Кёр. У другой палове дня ў суботу паступілі паведамленьні аб першых сутыкненьнях з паліцыяй і затрыманьні больш як 150 чалавек.
Першапачаткова прычынай маніфэстацый «жоўтых камізэлек» у канцы 2018 году стаў намер прэзыдэнта Эманюэля Макрона падвысіць падатак на аўтамабільнае паліва. Неўзабаве патрабаваньні маніфэстантаў пашырыліся да адстаўкі прэзыдэнта Макрона. Рух падтрымалі некалькі лідэраў асноўных палітычных партый і палітычных рухаў Францыі.
Рух працягваўся і пашыраўся ў 2019 годзе. Праводзіліся рэгулярныя суботнія маніфэстацыі з блякаваньнем вулічнага руху.
З 5 сьнежня 2019 году ў сувязі з пэнсійнай рэформай Парыж ахапілі масавыя страйкі, радыкальна настроеныя ўдзельнікі акцый учынялі пагромы.
11 студзеня 2020 году ўрад Францыі пастанавіў часова адмовіцца ад палажэньня праекту пэнсійнай рэформы, якое выклікае найбольшую крытыку — пункту, паводле якога поўная пэнсія будзе выплачвацца толькі пасьля дасягненьня 64 гадоў.
ГЛЯДЗІЦЕ ТАКСАМА: Макрон: Лукашэнка ня хоча, а Пуцін ня супраць АБСЭ як пасярэдніка ў БеларусіАляксандар Лукашэнка неаднаразова, абараняючы дзеяньні сілаў правапарадку ў Беларусі падчас цяперашніх пратэстаў, спасылаўся на дзеяньні францускіх уладаў і паліцыі супраць маніфэстацыяў «жоўтых камізэлек».
У адказ на прапанову прэзыдэнта Макрона выступіць пасярэднікам у беларускім унутрыпалітычным дыялёгу Аляксандар Лукашэнка 21 жніўня выказаў гатоўнасьць стаць пасярэднікам паміж Макронам і рухам «жоўтых камізэлек».