За жнівень золатавалютных рэзэрваў стала меней на 15,8% — гэта амаль 1,4 мільярда даляраў. Цяпер у скарбонцы Беларусі засталося каля 7,5 мільярда даляраў, паведаміў Нацбанк.
Асноўная прычына такога зьніжэньня — продаж Нацыянальным банкам валюты на біржавых таргах.
За няпоўны месяц пасьля выбараў даляр і эўра падаражэлі больш як на 8%. З улікам росту курсаў у пачатку году, выкліканага «каранакрызісам», даляр ад студзеня падаражэў на 25,6%, а эўра — на 33%, піша БелаПАН.
ГЛЯДЗІЦЕ ТАКСАМА: «Вельмі дарагі прэзыдэнт, даражэй не бывае», — эканаміст пра абвал беларускага рубля і ролю IT-сэктару
Сытуацыя ў банкаўскім сэктары Беларусі пагоршылася
Пра гэта ў інтэрвію БелаПАН сказала аналітык міжнароднага агенцтва Moody’s Investor Service Сьвятлана Паўлава.
«На наш погляд, ужо цяпер можна з упэўненасьцю сказаць, што сытуацыя ў банкаўскім сэктары Беларусі зьмянілася да горшага ў частцы ліквіднасьці (паглядзіце на стаўкі міжбанку), а таксама зь вялікай імавернасьцю зьменіцца да горшага ў найбліжэйшыя месяцы ў частцы якасьці актываў (з улікам чаканага падзеньня ВУП, а таксама зьніжэньня курсу нацыянальнай валюты, што ўскладніць абслугоўваньне валютных крэдытаў)», — адзначыла Паўлава.
ГЛЯДЗІЦЕ ТАКСАМА: Вонкавы дзяржаўны доўг Беларусі з пачатку году вырас да $ 17,8 млрд, — Міністэрства фінансаў