Колішні кіраўнік Пэнтагону Джэймс Мэтыс абвінаваціў прэзыдэнта ЗША Дональда Трампа ў спробе расколу амэрыканскага грамадзтва. Заяву экс-міністра абароны публікуе часопіс The Atlantic.
Мэтыс адзначае, што Трамп цалкам непатрэбна расколвае краіну і «мілітарызуе» рэакцыю Амэрыкі на пратэсты.
«Дональд Трамп — першы прэзыдэнт у маім жыцьці, які не спрабуе аб’яднаць амэрыканскі народ і нават не прыкідваецца, што спрабуе. Замест гэтага ён спрабуе падзяліць нас», — піша Мэтыс. Паводле яго, амэрыканцы могуць аб’яднацца, абапіраючыся на моцныя бакі сваёй грамадзянскай супольнасьці, без удзелу прэзыдэнта.
ГЛЯДЗІЦЕ ТАКСАМА: Пасьля самага доўгага ў гісторыі перапынку ў Пэнтагоне зьявіўся кіраўнікМэтыс таксама заявіў, што яго «ахапіў жах», калі 1 чэрвеня акцыю перад Белым домам супраць жорсткіх дзеяньняў паліцыянтаў разагнала паліцыя і Нацыянальная гвардыя. Пратэсты ў ЗША пачаліся пасьля затрыманьня паліцыяй у Мінэапалісе ў канцы траўня афраамэрыканца Джорджа Флойда, якое скончылася яго сьмерцю.
У адказ Трамп назваў Мэтыса «самым пераацэненым генэралам у сьвеце». Кіраўнік Белага дому таксама напісаў у твітэры, што моцнай якасьцю генэрала марской пяхоты былі не вайсковыя заслугі, а «хутчэй асабісты піяр».
Probably the only thing Barack Obama & I have in common is that we both had the honor of firing Jim Mattis, the world’s most overrated General. I asked for his letter of resignation, & felt great about it. His nickname was “Chaos”, which I didn’t like, & changed to “Mad Dog”...
— Donald J. Trump (@realDonaldTrump) June 4, 2020
Джэймс Мэтыс — генэрал Корпусу марской пяхоты ЗША ў адстаўцы. Ён узначаліў Пэнтагон на пачатку 2017 году. У сьнежні 2018 году Трамп абвясьціў аб звальненьні генэрала. СМІ тады пісалі, што міністар не пагадзіўся з рашэньнем Белага дому аб вывадзе вайскоўцаў ЗША з Сырыі.