Віцебскі абласны суд 19 траўня абвясьціў вырак былому старшыні Браслаўскага райвыканкаму Ўладзімеру Дранеўскаму і яго жонцы Алене Дранеўскай, былой начальніцы аддзелу эканомікі райвыканкаму, піша БелТА.
Уладзімера Дранеўскага асудзілі на 10 гадоў калёніі ўзмоцненага рэжыму, Алену Дранеўскую – на 4 гады калёніі ўзмоцненага рэжыму.
Цягам 5 гадоў сужэнцы ня змогуць займаць пасады, зьвязаныя з выкананьнем арганізацыйна-распарадчых абавязкаў.
У абвінавачаных канфіскавалі кватэру ў Менску, а таксама больш за 120 тысяч рублёў на карысьць:
- пацярпелых фізычных і юрыдычных асоб;
- у даход дзяржавы;
- у якасьці кампэнсацыі маральнай шкоды.
За што асудзілі?
Дзеяньні Ўладзімера Дранеўскага кваліфікавалі як:
- атрыманьне і даваньне хабару;
- перавышэньне ўлады ці службовых паўнамоцтваў;
- махлярства;
- саўдзел у злачынстве;
- крадзеж шляхам злоўжываньня службовымі паўнамоцтвамі;
- «адмываньне» сродкаў, атрыманых злачынным шляхам.
Алену Дранеўскую абвінавачвалі ў:
- саўдзеле ў злачынстве;
- перавышэньні ўлады ці службовых паўнамоцтваў;
- крадзяжы шляхам злоўжываньня службовымі паўнамоцтвамі;
- «адмываньні» сродкаў, атрыманых злачынным шляхам.
Прысуд не набыў моц і можа быць абскарджаны.
ГЛЯДЗІЦЕ ТАКСАМА: Лобзік, штаны, туі, буракі… Экс-кіраўніка Браслаўскага раёну пачалі судзіць за атрыманьне хабару