Італьянскі горад Вэнэцыя перажыў увечары 12 лістапада другую найгоршую паводку за час рэгулярнай фіксацыі ўзроўню вады з канца ХІХ стагодзьдзя.
У 22.50 12 лістапада ўзровень вады ў вэнэцыянскай лягуне дасягнуў адзнакі 187 сантымэтраў, паведамляе італьянскае агенцтва ANSA.
#AcquaAlta | Una marea eccezionale sta interessando #Venezia: 187 centimetri ⚠ Dopo i 194 centimetri del 1966 è il secondo livello nella storia ➡ Si raccomanda la massima cautela@veneziaunica @LuigiBrugnaro @CMVenezia @giornaleprociv pic.twitter.com/bKtpKyPWMH
— Comune di Venezia (@comunevenezia) November 12, 2019
Пад вадой апынулася каля 82 % тэрыторыі астраўной часткі гораду. Загінулі два чалавекі, у адным з выпадкаў ад удару электрычным токам у затопленым доме.
Некалькі суднаў гарадзкога воднага транспарту вынесла на набярэжную. Часткі вэнэцыянскіх астравоў заставаліся без электраэнэргіі.
Acqua alta #Venice vaporetto scaraventato a riva pic.twitter.com/jgEUa7RiwN
— Local Team (@localteamtv) November 13, 2019
Вада затапіла часткова і гістарычную базыліку Сан-Марка, толькі што адрамантаваную пасьля папярэдняй катастрафічнай паводкі ў канцы кастрычніка 2018 году. Мэр гораду Луіджы Бруньяра, прыплыўшы на плошчу перад саборам на катэры для інспэкцыі, заявіў: «Гэта ня проста надзвычайная паводка — гэта катастрофа, шкоду ад якой яшчэ трэба падлічыць».
Situazione drammatica pic.twitter.com/gS63ZK2j3Q
— Luigi Brugnaro (@LuigiBrugnaro) November 12, 2019
Паводле гістарычных дадзеных, часткі ўнутранай прасторы базылікі дагэтуль затаплівала толькі пяць разоў, пачынаючы з 9-га стагодзьдзя — з тых часоў двойчы за апошнія 20 гадоў (цяперашні раз стаў трэцім за гэты час). Міністар культурнай спадчыны і турызму Італіі Дарыё Франчэскіні паабяцаў даць сродкі для паляпшэньня абароны базылікі ад паводак.
👉 Stiamo affrondando una marea più che eccezionale.⚠ Tutti mobilitati per gestire l%27emergenza: #PoliziaLocale, @infprefve, #ProtezioneCivile del @comunevenezia, @vvfveneto e tutte le forze dell%27ordine, insieme per #Venezia pic.twitter.com/3HdZt2WwfN
— Luigi Brugnaro (@LuigiBrugnaro) November 12, 2019
Апошнімі днямі ў рэгіёне Вэнэта і на ўсім паўночным усходзе Італіі працягваюцца моцныя залевы зь вятрамі, якія таксама выклікалі паводкі і шкоду ў іншых мясцовасьцях.
Акрамя таго, з прычыны непагадзі значны ўрон і ахвяры зазналі і іншыя рэгіёны Італіі. Тым часам сыноптыкі папярэджваюць, што ў канцы тыдня над краінай пройдзе новы цыклён зь вятрамі і залевамі.
Acqua alta storica a Venezia: ragazzo nuota in piazza San Marco pic.twitter.com/5r9pA01xie
— Local Team (@localteamtv) November 12, 2019
Вэнэцыя, гістарычная частка якой разьмешчана на астравах у неглыбокай лягуне, цярпіць ад рэгулярных паводак, выкліканых шэрагам фактараў, усю сваю гісторыю. Некаторыя з гэтых паводак мелі катастрафічныя наступствы для гораду. З часу пачатку фіксацыі ўзроўню вады больш як стагодзьдзе таму найгоршая паводка, зь перавышэньнем на 194 сантымэтры над звыклым узроўнем вады, адбылася ў лістападзе 1966 году.