Парыскі заапарк у сераду паказаў шырокай публіцы таямнічы арганізм, які атрымаў назву «блоб» — гэта маленькая жаўтаватага колеру жывая істота. «Блоб» зьнешне падобны да грыбу, але па паводзінах нечым нагадвае жывёліну, паведамляе агенцтва Reuters.
У «блоба» няма ні рота, ні страўніка, ні вачэй, але тым ня менш ён можа знаходзіць ежу і ператраўліваць яе.
Яшчэ блага вывучаная істота мае 720 палоў (блоб размнажаецца зьліцьцём дзьвюх клетак, якія могуць быць 720 тыпаў). Ён можа рухацца без ног і крылаў, і загаіцца (прыйсьці ў першапачатковы стан) за дзьве хвіліны, калі яе разрэзаць напалову.
«Блоб — гэта жывая істота, якая належыць да адной з таямніц прыроды», — сказаў Бруно Давід, дырэктар Парыскага прыродазнаўчага музэю, якому належыць Заалягічны парк.
ГЛЯДЗІЦЕ ТАКСАМА: Урад Даніі купіў чатырох сланоў«Гэта нас зьдзіўляе, таму што яно ня мае мозгу, але пры гэтым здольнае вучыцца (...) і калі вы аб’яднаеце два "блобы", дык той, хто нечаму навучыўся, будзе перадаваць свае веды іншаму», — кажа Давід.
«Блоб» быў названы ў гонар аднайменнага навукова-фантастычнага фільму жахаў. У фільме, дзеяньні якога адбываюцца ў маленькім мястэчку амэрыканскага штату Пэнсільванія, іншаплянэтная форма жыцьця, названая «кропля» (па-ангельску «The Blob»), «зьядае» ўсё, што трапляецца на яе шляху.
ГЛЯДЗІЦЕ ТАКСАМА: Чаму нам давядзецца палюбіць насякомых — на смак«Мы дакладна ведаем, што гэта не расьліна, але мы сапраўды ня ведаем, ці гэта жывёліна, ці грыб», — сказаў Давід.
«Ён паводзіць сябе вельмі дзіўна для нечага, што выглядае як грыб (...) ён мае паводзіны жывёліны, ён здольны вучыцца».