Палітыка

Праз тры месяцы ў Гомельскай вобласьці зьявіўся кіраўнік

Генадзь Салавей, новы старшыня Гомельскага аблвыканкаму, архіўнае фота

Аляксандар Лукашэнка 29 ліпеня прызначыў старшынём Гомельскага аблвыканкаму Генадзя Салаўя. Крэсла было вакантным з красавіка.

  • Новы кіраўнік Гомельшыны нарадзіўся ў 1963 годзе ў вёсцы Тупалы, што ў Наваградзкім раёне Горадзенскай вобласьці.
  • У 1988 годзе скончыў сельскагаспадарчую акадэмію, пазьней адвучыўся ў Акадэміі кіраваньня.
  • Пачынаў працаваць у розных сельскагаспадарчых арганізацыях Нясьвіскага раёну, ад 1992 году працаваў у сельскагаспадарчым каапэратыве «Лань», дзе ў 2011 годзе падняўся да пасады дырэктара.
  • Ад 2012 году працаваў у Нясьвіскім райвыканкаме, узначальваў Клецкі райвыканкам.
  • Быў першым намесьнікам старшыні Гомельскага аблвыканкаму.

Папярэдні старшыня Гомельскага аблвыканкаму Ўладзімер Дворнік займаў пасаду ад 2010 году да красавіка 2019-га, пакуль ня быў прызначаны намесьнікам прэм’ер-міністра — ён заняў месца Міхаіла Русага, якога Лукашэнка пасьля «разносу ў кароўніку» перавёў на пасаду памочніка прэзыдэнта і інспэктара па Магілёўскай вобласьці.

ГЛЯДЗІЦЕ ТАКСАМА: Пасьля крытыкі Лукашэнкі за «Асьвенцім у кароўніку» завялі 15 крымінальных спраў

Таксама 29 ліпеня Лукашэнка прызначыў:

  • памочнікам прэзыдэнта і інспэктарам па Віцебскай вобласьці — Анатоля Ліневіча, які раней быў старшынём Капыльскага райвыканкаму;
  • першым намесьнікам міністра сувязі — Сяргея Несьцяровіча, які раней быў дырэктарам дэпартамэнту інфармацыйных тэхналёгіяў Эўразійскай эканамічнай камісіі;
  • намесьнікам міністра адукацыі — Аляксандра Кадлубая, які раней быў начальнікам упраўленьня адукацыі Лідзкага райвыканкаму;
  • дырэктарам Беларускага мэталюргічнага заводу — Дзьмітрыя Корчыка, які раней быў намесьнікам міністра прамысловасьці;
  • дырэктарам Беларускай унівэрсальнай таварнай біржы — Аляксандра Асмалоўскага, які раней быў начальнікам Галоўнага упраўленьня абслугоўваньня дыпляматычнага корпусу ва Ўпраўленьні справамі прэзыдэнта;
  • намесьнікам начальніка Беларускай чыгункі — Андрэя Якабсана, які да таго быў начальнікам Гомельскага лякаматыўнага дэпо;
  • старшыняў Асіповіцкага, Валожынскага, Глыбоцкага, Горацкага, Жыткавіцкага, Капыльскага, Кармянскага, Кіраўскага, Круглянскага, Любанскага, Слаўгарадзкага і Шумілінскага райвыканкамаў.