Свабода параўнала кошты навучаньня ў Беларусі, Літве, Чэхіі, Украіне і Расеі.
Беларускія ВНУ паднялі цэны на навучаньне яшчэ да пачатку навучальнага году. Пра павелічэньне аплаты паведамілі 10 ліпеня БНТУ, БДЭУ, Лінгвістычны ўнівэрсытэт, Акадэмія кіраваньня. Агулам рост коштаў склаў 4–9%.
Глядзім, якая розьніца ў коштах у параўнаньні зь іншымі краінамі. Для прыкладу, на спэцыяльнасьці, зьвязаныя з ІТ-тэхналёгіямі і праграмаваньнем.
У БДУ год навучаньня на факультэце прыкладной матэматыкі і інфарматыкі па спэцыяльнасьці «праграмнае забесьпячэньне кампутарных сыстэм» у бакаляўрэаце каштуе 2964 рублі, або 1482 даляры. Гэты кошт — для грамадзян Беларусі.
Глядзім адпаведную спэцыяльнасьць у ВНУ іншых краін. Кошты — для грамадзян гэтай краіны або для грамадзян ЭЗ.
- Літва — 2727 даляраў;
- Украіна — 1363 даляры;
- Чэхія — 3917 даляраў;
- Расея — 5563 даляры.
Для параўнаньня браліся вядучыя ВНУ ў гэтых краінах: Віленскі ўнівэрсытэт, Унівэрсытэт імя Тараса Шаўчэнкі, Карлаў унівэрсытэт, Маскоўскі дзяржаўны ўнівэрсытэт імя Ламаносава. У Чэхіі ўся адукацыя на чэскай мове бясплатная, таму падаём кошт навучаньня па-ангельску для грамадзянаў ЭЗ.
Па іншых спэцыяльнасьцях суадносіны коштаў у ВНУ Беларусі і астатніх пералічаных краін падобныя.