«Едзьце дадому». Беларуса ў майцы з Пагоняй зьбілі ў Беластоку

Аляксандар Лаўрэнцьеў. Фота Hrodna.Life

Актывіста з Горадні Аляксандра Лаўрэнцьева і расейскага актывіста Алега Савіна зьбілі ў Беластоку. Абодва былі ў майках з выявай Пагоні і надпісам Belarus.

Мужчыны цяпер часова працуюць у Польшчы. Падзеі адбываліся побач з інтэрнатам, дзе яны жывуць.

Як расказаў Аляксандар Лаўрэнцьеў, напад адбыўся ўвечары 29 чэрвеня. Яны зь сябрам адпачывалі каля інтэрнату. Раптам падышла кампанія невядомых маладых людзей і бяз бачнай прычыны пачала зьбіваць іншых маладзёнаў, якія былі побач.

Калі тыя ўцяклі, нападнікі пераключыліся на Лаўрэнцьева і Савіна. Білі па тулаве, твары, галаве. Нападнікі — мужчыны ва ўзросьце 25–30 гадоў, іх было 4 або 5. Падчас бойкі хлопцы паўтаралі: «Едзьце дадому. Мы яшчэ вернемся». Нехта пагражаў парваць майку з Пагоняй.

ГЛЯДЗІЦЕ ТАКСАМА: Як Менску дагнаць Варшаву. Раіць польскі дасьледнік будучыні

У згаданых інтэрнатах на вуліцы Зьвежынецкай жывуць іншаземцы, што прыехалі ў Беласток на заробкі.

Завялі крымінальную справу. Ці знайшлі нападнікаў, пацярпелыя хлопцы пакуль ня ведаюць.

Па іхніх словах, раней пра бойкі на нацыянальнай глебе ў гэтым раёне Беластоку не было чуваць.

Аляксандар Лаўрэньцьеў вядомы пэрфомансамі ў Горадні, калі ён апранаўся ў турэмную робу, каб заявіць пра абмежаваньне сваіх правоў, і ставіў намёт перад гарадзкой адміністрацыяй, каб прыцягнуць увагу да жыльлёвых праблемаў у горадзе.

ГЛЯДЗІЦЕ ТАКСАМА: «Мордай у асфальт». Горадзенскіх актывістаў затрымалі за плякат супраць «самаўладзьдзя»

Алег Савін пасьля анэксіі Крыму зладзіў акцыю ў Калінінградзе перад мясцовай адміністрацыяй, узьняўшы нямецкі сьцяг. Так ён хацеў паказаць, што калі Крым — расейскі, то Кёнігзбэрг — нямецкі.