У нядзелю, 30 чэрвеня, у Польшчы будуць сьвяткаваць 450-годзьдзе падпісаньня Люблінскай уніі — зьвязу паміж Каронай Польскай і Вялікім Княствам Літоўскім. На ўрачыстасьцях зьявяцца і беларускія дэпутаты. Але прадстаўляць ВКЛ будуць літоўскія палітыкі.
Галоўныя ўрачыстасьці з удзелам іншаземных прадстаўнікоў пройдуць у Любліне. Прэс-служба польскага парлямэнту, якая арганізуе сьвяткаваньні, ня згадвае ў прэс-рэлізе пра ўдзел ва ўрачыстасьцях беларускай дэлегацыі. Пра гэта гаворыцца ў календары на сайце Палаты прадстаўнікоў Беларусі адным сказам. Хто канкрэтна будзе там ад імя Беларусь і на якім узроўні — не паведамляецца.
Unia polsko-litewska🇵🇱🇱🇹umożliwiła narodziny wyjątkowego systemu państwowości i była jednym z najważniejszych wydarzeń stulecia na kontynencie🎥Zapraszamy na obchody 450. rocznicy Unii Lubelskiej pic.twitter.com/xU29qh0RQS
— Sejm RP (@KancelariaSejmu) 22 czerwca 2019
З афіцыйных відэаролікаў, якія рэклямуюць падзею, і запрашэньнях па-польску і літоўску вынікае, што галоўным прадстаўніком Вялікага Княства Літоўскага на ўрачыстасьці будзе сучасная Літва. У Люблін прыедзе сьпікер літоўскага Сэйму Віктарас Пранкеціс, адбудзецца таксама паседжаньне Парлямэнцкай асамблеі Польшчы і Літвы.
Люблінская ўнія, Ян Матэйка
1 ліпеня 1569 году была падпісаная Люблінская унія. Дзьве краіны – Вялікае Княства Літоўскае і Польшча – аб’ядналіся ў адну фэдэратыўную Рэч Паспалітую. Унія ўзмацніла сярэднявечную беларускую дзяржаву, якая сама ўжо не спраўлялася са зьнешнімі агрэсіямі, але ўрэшце паспрыяла палянізацыі тагачаснай эліты краіны.