У Беларусі летась пакаралі 46 судзьдзяў, шасьцярых звольнілі і аднаго пасадзілі

Пасьля сустрэчы з Аляксандрам Лукашэнкам старшыня Вярхоўнага суду Валянцін Сукала выступіў на дзяржаўным тэлеканале «Беларусь-1», дзе расказаў пра колькасьць судзьдзяў, пакараных у Беларусі за мінулы год. На сустрэчы Лукашэнка казаў, што інфармацыя пра супрацьпраўную дзейнасьць судзьдзяў «ні ў якія вароты ня лезе».

ГЛЯДЗІЦЕ ТАКСАМА: Лукашэнка заявіў, што судзьдзі «зашмат» парушаюць закон

​Валянцін Сукала заявіў, што «мы дастаткова сурова падыходзім [да пакараньняў судзьдзяў], бо калі ўжо судзьдзя парушыў закон, гэта недапушчальна».

Паводле Сукалы:

• Адзін судзьдзя быў прыцягнуты да крымінальнай адказнасьці і пазбаўлены волі. Сукала не сказаў, што гэта была за справа. Але падобна, гаворка пра берасьцейскага судзьдзю Алега Міранюка, які ў ліпені атрымаў два гады калёніі агульнага рэжыму з забаронай на 5 гадоў працаваць у судах і праваахоўных органах за «заведама неправасуднае» рашэньне, якое дапамагло ягонай жонцы (асуджанай на 4 гады калёніі з канфіскацыяй маёмасьці) заключыць незаконную ўгоду зь нерухомасьцю.
• Шэсьць судзьдзяў звольнілі «на падставах, якія дыскрэдытуюць, у сувязі зь немагчымасьцю ажыцьцяўляць судовую дзейнасьць».
• 46 судзьдзяў пакаралі за парушэньне кодэксу гонару. Якімі менавіта былі парушэньні і пакараньні, Сукала не ўдакладніў, сказаў толькі, што «яны былі прыцягнутыя да дысцыплінарнай адказнасьці, гэта самае суровае пакараньне для іх, гэта ідзе ў біяграфію судзьдзі».
• 178 работнікаў судовага апарату пакараныя за розныя іншыя ўчынкі.

ГЛЯДЗІЦЕ ТАКСАМА: Каго і на колькі? За што ў Беларусі судзяць судзьдзяў

Канюк таксама расказаў, што колькасьць карупцыйных злачынстваў вырасла ў 2018 годзе, колькасьць асуджаных перавысіла тысячу чалавек.

Пры гэтым у Беларусі працягваюць працаваць судзьдзі, якіх вінавацілі ў палітычна матываваных прысудах, у тым ліку судзьдзі з «санкцыйнага сьпісу» Эўразьвязу.

Адзін з судзьдзяў, якога вінавацілі ў палітычна матываваных выраках, цяпер разглядае справу галоўнай рэдактаркі Tut.by Марыны Золатавай, якую некаторыя называюць палітычна матываванай. У тым жа інтэрвію «Беларусь-1» Сукала казаў, нібыта павышаная ўвага да такога працэсу можа быць ускосным ціскам на суд.

ГЛЯДЗІЦЕ ТАКСАМА: «Увага да працэсу Золатавай — гэта ціск на суд», — старшыня Вярхоўнага суду. Чаму гэта ня так ГЛЯДЗІЦЕ ТАКСАМА: Пажыцьцёвае зьняволеньне ў Беларусі адбываюць больш за 160 чалавек ГЛЯДЗІЦЕ ТАКСАМА: Лепей не раскрыць злачынства, чым пакараць невінаватага. 4 цытаты Лукашэнкі пра сьледчых і пракуратуру