19 лютага ў Варшаве галоўная рэдактарка сайту Charter97.org Натальля Радзіна была ўзнагароджана мэдалём да стагодзьдзя Беларускай Народнай Рэспублікі.
Узнагароду ўручыў прадстаўнік рады БНР, намесьнік дырэктара тэлеканалу «Белсат» Аляксей Дзікавіцкі.
«Да 100-годзьдзя зь дня абвяшчэньня Беларускай Народнай Рэспублікі Рада БНР упершыню вырашыла заснаваць мэдаль, якая ўручаецца ня толькі беларусам, але і наогул людзям, якія працуюць на ніве беларушчыны, якія папулярызуюць беларускую ідэю ў сьвеце — усім тым, каго можна назваць верным ідэалам 25 Сакавіка 1918 году, ідэалам свабоднай, дэмакратычнай, незалежнай Беларусі» — сказаў Аляксей Дзікавіцкі.
Ён паведаміў, што такіх мэдалёў будзе 130, яны будуць уручацца ў розных краінах. Першы мэдаль атрымала 18 лютага сёлета Зінаіда Туронак — удава выбітнага беларускага гісторыка Юрыя Туронка — за свайго мужа, які пайшоў з жыцьця 2 студзеня сёлета.
ГЛЯДЗІЦЕ ТАКСАМА: Беларусы Флорыды памянулі зьніклых і падтрымалі «Хартыю 97»Другой мэдаль атрымала Натальля Радзіна. «Можна любіць ці не любіць «Хартыю-97», але бясспрэчным зьяўляецца той факт, што сотні тысяч людзей штодня даведваюцца пра сытуацыю ў Беларусі менавіта дзякуючы гэтаму парталу — падкрэсьліў намесьнік дырэктара тэлеканалу «Белсат».
Ён дадаў, што ў такой цяжкай сытуацыі, у якой сёньня апынулася «Хартыя-97», Рада БНР вырашыла паскорыць гэтае ўзнагароджаньне, каб такім чынам падтрымаць партал.
ГЛЯДЗІЦЕ ТАКСАМА: Польскі фонд тлумачыць, чаму скараціў падтрымку «Хартыі-97»«Рада БНР ужо зрабіла заяву ў падтрымку "Хартыі-97″, але мы спадзяемся, што самая цырымонія ўручэньня ўзнагароды прыцягне ўвагу да сытуацыі вакол "Хартыі" там, дзе гэта трэба, і сайт будзе і далей працаваць і выконваць сваю выключна важную місію» — заявіў Аляксей Дзікавіцкі, уручаюць узнагароду.
Пасьля гэтага быў зачытаны дэкрэт старшыні Рады БНР Івонкі Сурвілы аб узнагароджаньні Радзінай.
«Атрымаць гэты мэдаль ад рады БНР для мяне — вялікі гонар. Беларуская Народная Рэспубліка — гэта сымбаль нашай незалежнасьці і свабоды. Я ведаю, што Рада Ўкраінскай Народнай Рэспублікі перадала свае паўнамоцтвы ўраду незалежнай Украіны. У Беларусі, на жаль, сёньня гэта немагчыма. Рэжым Лукашэнкі нелегітымны. Я ўспрымаю гэты мэдаль як дзяржаўную ўзнагароду і лічу што гэта ўзнагарода — усёй камандзе "Хартыі-97″. Асабліва дзякуй за тое, што падтрымалі нас у такі цяжкі час, калі салідарнасьць неабходная і "Хартыі", і ўсяму свабоднаму слову Беларусі» — скзала Натальля Радзіна.
ГЛЯДЗІЦЕ ТАКСАМА: Менскія ўлады: вуліцы 25 Сакавіка ня будзе. Найменьні зь лічбамі «непажаданыя», хоць іх больш за 300Мэдаль да стагодзьдзя Рада БНР уручае «за прыжыцьцёвыя заслугі ў зьдзяйсьненьні ідэалаў Акту 25 сакавіка 1918 году, у тым ліку за дасьледаваньні і папулярызацыю беларускай мовы, здабыцьцё і ўмацаваньне дзяржаўнай незалежнасьці Беларусі, барацьбу за свабоду і дэмакратыю ў Беларусі».
Мэдаль, сярод іншых, атрымаюць пісьменьнік Уладзімер Арлоў, пасол Швэцыі ў Беларусі Стэфан Эрыксан, акадэмік Радзім Гарэцкі, удзельнікі стварэньня эталёну дзяржаўнага гербу «Пагоня» Аляксей Марачкін і Леў Талбузін і многія іншыя.