66 чалавек загінулі і 76 параненыя ў выніку выбуху трубаправода ў Мэксыцы, паведамляе агенцтва Reuters са спасылкай на губэрнатара штата Ідальга.
Інцыдэнт адбыўся ў ноч на 19 студзеня прыкладна ў 100 кілямэтрах на поўнач ад Мэхіка. Па заяве дзяржаўнай кампаніі Pemex, якой належыць трубаправод, катастрофа адбылася з прычыны нелегальнай урэзкі ў трубу.
Прадстаўнікі кампаніі адсачылі ўрэзку, на месца былі адпраўленыя вайскоўцы. Аднак яны ня сталі ўмешвацца ў выкраданьне паліва, каб пазьбегнуць праблем, — распавёў міністар бясьпекі краіны Альфонса Дураса.
Месца выбуху ачэпленае вайскоўцамі. Дзясяткі абвугленых целаў зь яго пакуль не прыбраныя, адзначае Reuters, паколькі іх вывучаюць судовыя экспэрты.