Пытаньні супрацоўніцтва Беларусі і Ватыкана абмеркаваныя 13 лістапада на сустрэчы намесьніка міністра замежных спраў Алега Краўчанкі і апостальскага нунцыя (пастаянны дыпляматычны прадстаўнік папы рымскага) Габара Пінтэра, паведаміла прэс-служба МЗС.
Падрабязнасьці размовы не прыводзяцца, паведамляе БелаПан.
Афіцыйны Менск даўно чакае прыезду пантыфіка ў Беларусь.
ГЛЯДЗІЦЕ ТАКСАМА: Арцыбіскуп Кандрусевіч: вымалёўваецца надзея на візыт Папы ў БеларусьПадчас візыту ў Ватыкан у траўні 2016 года Аляксандр Лукашэнка прапанаваў папе рымскаму Францішку сустрэцца з патрыярхам Кірылам на беларускай тэрыторыі. Незадоўга да гэтага, у лютым, пантыфік сустракаўся з прадстаяцелем РПЦ на Кубе.
Пасьля сустрэчы з папам рымскім Лукашэнка заявіў: «Я выказаў думку, што пантыфіку пара прыехаць у Беларусь і разам з нашым патрыярхам сустрэцца з нашымі жыхарамі». Сваю прапанову ён паўтарыў на сустрэчы з удзельнікамі пленарнага пасяджэньня Савета біскупскіх канфэрэнцый Эўропы 28 верасьня 2017 года ў Менску.