У Лёндане зьявіліся білборды з выявай прэзыдэнта Расеі Ўладзіміра Пуціна і заклікам «адзначыць чырвона-бела-блакітны Брэксіт». Пра гэта паведамляе Reuters.
Рэклямныя шчыты выкупіла група актывістаў Proud Bear. На двух зь іх знаходзяцца аднолькавыя фатаграфіі Пуціна, які падміргвае на блакітным фоне, з надпісамі, у якіх у слове BREXIT ангельская літара «R» заменена на кірылічную «Я». На яшчэ адным плякаце намаляваны пасьлядоўны апанэнт Брэксіту, былы міністар замежных справаў Вялікабрытаніі Борыс Джонсан, з расейскімі сьцягамі і подпісам з таксама зьмененымі літарамі: «Дзякуй табе, BOЯIS».
#PROUDBEAR officers from POSTER SPETSNAZ division deployed ACROSS London to start celebration of #Brexit COLLABORATION. People of UNITED BRITAIN, many more for you to find! 🕵️♂️ pic.twitter.com/yqpz687QIx
— Proud Bear (@Pr0ud_Bear) November 8, 2018
На сваёй старонцы ў твітэры актывісты Proud Bear называюць сябе «калектывам расейскіх афіцэраў ГРУ», якія «гадамі дапамагаюць народу Англіі вызваліцца ад Эўрапейскага зьвязу і дэмакратычных выбараў».
На відэа, разьмешчаным Proud Bear, Пуцін катаецца на мопсе з галавой Аарона Бэнкса. Прадпрымальніка падазраюць у тым, што ён мог атрымліваць грошы на агітацыю за выхад краіны з Эўразьвязу ад Расеі. На днях Нацыянальнае крымінальнае агенцтва Вялікабрытаніі пачало расьсьледаваньне ў дачыненьні да Бэнкса.
We are #PROUDBEAR, collective of Russia GRU officers who help make #Brexit WINNING. Pay 💰💰💰 here to celebrate TOGETHER SUCCESS! >> https://t.co/Vsz8exlndk 🇷🇺🏴 pic.twitter.com/EZYIXRkrfQ
— Proud Bear (@Pr0ud_Bear) November 7, 2018
Агенцтву Reuters удалося зьвязацца з прадстаўніком Proud Bear, які ў адказ даслаў заяву на расейскай мове, у якой гаворыцца, што група занепакоеная станам расейскай дэмакратыі і выступае супраць «аўтарытарных тэндэнцый Масквы». Аднак хто канкрэтна стаіць за гэтай акцыяй, прадстаўнік Proud Bear паведаміць адмовіўся.
23 чэрвеня 2016 года 52 адсоткі брытанцаў прагаласавалі на рэфэрэндуме за выхад Вялікабрытаніі з Эўразьвязу. Брытанскія ўлады раней заяўлялі, што ім не ўдалося знайсьці доказаў ўмяшаньня Расеі ў галасаваньне. Многія брытанцы не пагадзіліся з вынікамі рэфэрэндуму і да гэтага часу лічаць, што ў галасаваньне ўмяшаліся расейскія спэцслужбы. 20 кастрычніка сотні тысяч жыхароў Лёндану выйшлі на мітынг за паўторны рэфэрэндум.