Два караблі ВМС Украіны прайшлі пад аркамі кантраляванага Расеяй Крымскага моста падчас маршруту з Адэсы ў Бярдзянск — горад, дзе ствараецца база ўкраінскага флёту ў Азоўскім моры.
Пра гэта паведамляе «Украінскі мілітарысцкі партал». Гаворка ідзе пра пошукава-выратавальнае судна «Данбас» і марскі буксір «Корац». Прыкладна ў гэты ж час самалёт-выведнік Boeing RC-135V вайскова-паветраных сілаў ЗША пачаў палёты паблізу Керчанскага праліву.
Карабель «Данбас» плянуецца выкарыстоўваць для ўзмацненьня інфраструктуры флёту ў Азоўскім моры. На ім могуць разьмясьціць штаб будучай базы, месцы для пражываньня вайскоўцаў, склады і іншыя памяшканьні. «Корац» прызначаны для буксіроўкі іншых судоў. Абодва караблі былі пабудаваныя амаль 50 гадоў таму. Зь Бярдянску ім насустрач выправіліся малыя браняваныя артылерыйскія катэры «Крэменчуг» і «Лубны», нядаўна спушчаныя на ваду. Частку шляху ўкраінскія караблі прайшлі ў суправаджэньні расейскіх караблёў берагавой аховы.
ГЛЯДЗІЦЕ ТАКСАМА: Украінскія караблі ідуць у Азоўскае мора ў суправаджэньні паветранай выведкі ЗШАСтаршыня праўленьня Ўкраінскага цэнтру ўзбраеньняў Тарас Чмут назваў цяперашнія манэўры першым выпадкам, калі ўкраінскія вайскова-марскія сілы ня проста рэагуюць на дзеяньні расейскага боку, а «задаюць тон гульні».
Гэтая апэрацыя пасьледавала за дзеяньнямі Расеі, якая, паводле дадзеных Дзяржаўнай памежнай службы, ад красавіка затрымала ў Азоўскім моры больш за 150 замежных судоў, якія накіроўваліся ва ўкраінскія парты. Масква зьдзяйсьняе затрыманьні на падставе дамовы аб супрацоўніцтве ў выкарыстаньні Азоўскага мора і Керчанскага праліву. Украінскія дэпутаты прапанавалі прэзыдэнту краіны Пятру Парашэнку дэнансаваць гэтае пагадненьне. У сярэдзіне верасьня памежная служба Ўкраіны абвясьціла пра накіраваньне некалькіх соцень спэцназаўцаў у падразьдзяленьні на Азоўскім і Чорным морах для процідзеяньня Расеі.
У пачатку месяца рада нацыянальнай бясьпекі і абароны Ўкраіны зацьвердзіла комплекс захадаў для абароны інтарэсаў краіны ў Азоўскім і Чорным морах. У прэс-службе адзначылі, што Кіеў мае намер узмацніць вайсковую прысутнасьць у рэгіёнах, разьмясьціўшы там зброю. Праз два тыдні амэрыканскі спэцпрадстаўнік па Ўкраіне Курт Волкер заявіў, што ЗША гатовыя перадаць Кіеву дадатковую баявую зброю для ўзмацненьня СПА і абароны марскога ўзьбярэжжа ва ўмовах, калі Масква спрабуе «узмацніць дамінаваньне» у Азоўскім моры.