Украінскі баксэр Аляксандр Усік адхіліў ідэю прысвоіць яму званьне героя краіны за перамогу над расейцам Муратам Гасіевым. Пра гэта паведамляе агенцтва УНІАН.
Вусік патлумачыў сваё рашэньне тым, што яму досыць народнага прызнаньня. «Для свайго народу, для пэўнай колькасьці людзей маёй краіны я і так зьяўляюся героем... вось гэта прызнаньне, а ня зоркі, якія вы там раздаяце абы каму», — заявіў баксэр на прэсавай канфэрэнцыі ў Кіеве.
Вусік пасьля перамогі над Гасіевым у канцы ліпеня стаў першым у гісторыі абсалютным чэмпіёнам сьвету па боксе ў першай цяжкай вазе. Прэзыдэнт Пятро Парашэнка назваў гэтую перамогу сымбалем барацьбы Ўкраіны. Прэм’ер-міністар краіны Ўладзімір Гройсман, у сваю чаргу, прапанаваў прысвоіць Усіку званьне героя Ўкраіны.