Зварот асуджанага ў Беларусі да сьмяротнага пакараньня Сямёна Беражнога 28 чэрвеня быў зарэгістраваны ў Камітэце ААН па правах чалавека, піша праваабарончы цэнтар «Вясна».
Паведамленьне ў Камітэт «ўжо накіраванае дзяржаве-ўдзельніку разам з запытам аб прыняцьці часовых мераў у выглядзе прыпыненьня выкананьня пакараньня ў выглядзе сьмяротнай кары да вынясеньня Камітэтам канчатковага рашэньня ў дачыненьні да гэтага паведамленьня», напісана ў адказе, які атрымаў праваабаронца Андрэй Палуда.
Раней намесьнік старшыні Вярхоўнага суду прыпыніў выкананьне сьмяротных прысудаў паводле справы «чорных рыэлтараў» — Сямёну Беражному і Ігару Гершанкову.
Гершанкова і Беражнога 21 ліпеня 2017 году прызналі вінаватымі ў забойстве шасьці чалавек, падрыхтоўцы да забойства яшчэ траіх, махлярстве, вымагальніцтве, разбоі, захоўваньні наркатычных рэчываў. Фігурантамі справы былі таксама жонка Гершанкова Тацяна (яе асудзілі на 24 гады калёніі агульнага рэжыму з канфіскацыяй маёмасьці) і жыхар Магілёва Барыс Калесьнікаў (атрымаў 22 гады).