У Расеі, у Растове-на-Доне, Паўночна-Каўкаскі акруговы вайсковы суд вынес прысуд абвінавачаным у захопе закладнікаў і арганізацыі тэракту ў Будзёнаўску ў 1995 годзе — Рамзану Бялялаву, Бадрудзі Даўдаву і Магамэду Маздаеву.
Бялялаву прысудзілі 15 гадоў калёніі агульнага рэжыму, Даўдаву — 14, Маздаеву — 13 гадоў зьняволеньня.
У чэрвені 1995 году, паводле сьледзтва, яны разам з групай Шаміля Басаева напалі на жыхароў Будзёнаўску Стаўрапольскага краю, у выніку чаго загінулі 129 чалавек, 317 былі параненыя.
1586 грамадзян былі захопленыя і ўтрымліваліся ў закладніках.
Маздаева затрымалі ў Валгаградзкай вобласьці ў сьнежні 2014 году, Бялялава — улетку 2015 году ў Чачні. У Сьледчым камітэце Расеі сьцьвярджаюць, што дачыненьне затрыманых да нападу на Будзёнаўск пацьвярджаецца відэазапісамі ў матэрыялах крымінальнай справы.
Да крымінальнай адказнасьці ў гэтай справе раней было прыцягнута каля 30 удзельнікаў нападу, яшчэ 23 чалавекі знаходзяцца ў фэдэральным вышуку. Шаміль Басаеў загінуў у 2006 годзе.