На Чарнігаўшчыне ў выніку агнястрэльнага ранення сканаў ўкраінскі рэжысёр Леанід Кантэр. Паводле папярэдніх дадзеных, Кантэр скончыў жыцьцё самагубствам.
Гэтую інфармацыю каналу «Громадське телебачення» пацьвердзілі ў паліцыі Чарнігаўскай вобласьці. Таксама факт гібелі Кантэра пацьвердзіла ягоная калега Кацярына Мізіна.
Паведамленьне ў паліцыю паступіла 4 чэрвеня, каля 22 гадзін. На месцы паліцыя знайшла перадсьмяротную запіску і агнястрэльную зброю.
Леанід Кантэр быў рэжысэрам фільму «Міт» пра Васіля Сьліпака, опэрнага сьпевака і ўдзельніка баявых дзеяньняў, які загінуў на Данбасе.
Адзін з самых вядомых мастацкіх праектаў Леаніда Кантэра называўся «З табурэтам да акіяну». Удзельнікі вандравалі ад гораду да гораду, ад вёскі да вёскі, дзе спантанна гралі спэктаклі. Сымбалем экспэдыцыі быў звычайны драўляны табурэт, які выкарыстоўвалі ў часе спэктаклю як міні-дэкарацыю. Пасьля Кантэр разам зь беларусамі Аўгіньняй Манцэвіч і Ўладзіславам Юрковым удзельнічаў у кругасьветным падарожжы «З табурэтам праз кантынэнты».