У Расеі, у Трацьцякоўскай галерэі ў Маскве ўвечары 25 траўня наведвальнік пашкодзіў карціну Ільлі Рэпіна «Іван Жахлівы і сын яго Іван», вядомую таксама як «Іван Жахлівы забівае свайго сына».
Карціна сур’ёзна пашкоджаная — у трох месцах прарванае палатно, пацярпела аўтарская рама.
«На шчасьце, самае каштоўнае — выявы твараў і рук цара і царэвіча — не пацярпелі», — заявілі «Інтэрфаксу» у прэс-службе галерэі.
Карціна адпраўленая ў рэстаўрацыйную майстэрню.
У паліцыі паведамілі пра затрыманьне ў музэі чалавека, які «мэталёвым слупком агароджы разьбіў шкло карціны і пашкодзіў палатно».
Узбуджаная крымінальная справа аб пашкоджаньні культурных каштоўнасьцяў.
Вандалам аказаўся беспрацоўны мужчына з Варонескай вобласьці. На допыце ён распавёў, што вырашыў напасьці на карціну, бо лічыць яе гістарычна няслушнай. Потым прызнаўся, што быў п’яны.
Рэстаўрацыя карціны можа заняць некалькі гадоў.