Намесьнік старшыні аблвыканкаму Андрэй Кунцэвіч заяўляе, што прадстаўнікі ўлады абавязаныя выступіць на мітынгу супраць дэкрэту № 3, але, напісаў ён у Твітэры, калі такая акцыя будзе дазволеная. Гэтак службовец адказаў на пытаньне, ці выйдзе прадстаўнік улады да народу на мітынг 15 сакавіка.
@SLaputin Власть обязана быть на таком митинге. Но заявка на его проведение не подавалась. Людей зовут на митинг незаконно. Людей используют
— Андрей Кунцевич (@KuncevichA) March 11, 2017
«Улада абавязаная быць на такім мітынгу. Але заяўка на яго правядзеньне не падавалася. Людзей завуць на мітынг незаконна. Людзей выкарыстоўваюць», — адзначыў чыноўнік, які курыруе пытаньні ідэалёгіі ў аблвыканкаме.
Арганізатары акцыі пратэсту «Марш недармаедаў» пацьвярджаюць, што не зьвярталіся ў гарвыканкам па дазвол, а толькі паінфармавалі чыноўнікаў, што яна мае адбыцца 15 сакавіка. Ліст у гарвыканкам падпісалі кіраўнік абласной арганізацыі АГП Уладзімер Шанцаў, каардынатар аргкамітэту дзеля стварэньня партыі Беларуская хрысьціянская дэмакратыя Алег Аксёнаў, а таксама першы намесьнік старшыні Беларускай сацыял-дэкратычнай партыі «Грамада» Ігар Барысаў ды сябра руху «За свабоду» Аляксандар Сілкоў. Аксёнаву 14 сакавіка далі 15 сутак адміністрацыйнага арышту. Шанцава ўтрымліваюць у ізалятары часовага ўтрыманьня. Судзіць будуць 15 сакавіка.
Гарвыканкам адпісаў арганізатарам, што дазволіць дэманстрацыю і мітынг «Марш недармаедаў» «не прадстаўляецца магчымым». У лісьце, падпісаным намесьніцай старшыні гарвыканкаму Алай Галашкай, заяўнікам нагадалі, што «месцам правядзеньня пікетаў, мітынгаў, сходаў, арганізатарамі якіх выступаюць палітычныя партыі, грамадзкія аб’яднаньні, прафсаюзныя арганізацыі, вызначаная пляцоўка каля дома № 64 В па вуліцы Чалюскінцаў».
Пляцоўка, на якую спасылаюцца чыноўнікі, знаходзіцца ўдалечыні ад людных гарадзкіх вуліц.