Паводле Верамеенкі, да яго раніцай патэлефанаваў участковы міліцыянт і запрасіў у пастарунак, маўляў, на яго складзены пратакол за непадпарадкаваньне патрабаваньням судовага выканаўцы. А калі ён зьявіўся ва ўчастак, яго адразу павезьлі ў суд.
— Я ўжо ў дарозе пачаў пісаць скаргу на ўчастковага, які склаў такі пратакол, паколькі ўсе абвінавачаньні ў мой адрас ня маюць ніякіх падстаў.
У сьнежні да Верамеенкі наведаўся судовы выканаўца з тым, каб апісаць маёмасьць за тое, што ён ня выплаціў штраф за ўдзел у несанкцыянаваным пікеце. Паводле Верамеенкі, ён патлумачыў судоваму выканаўцу, што аспрэчвае рашэньне суду ў вышэйшай судовай інстанцыі, аднак той настойваў на сваім і выклікаў міліцыянтаў.
— Я і амапаўцам, якія зьявіліся на выклік, паказаў паперы і патлумачыў, што аспрэчваю рашэньне суду, а паводле заканадаўства, на гэты пэрыяд часу ніякага вопісу маёй маёмасьці ня можа весьціся. Яны пагадзіліся і пайшлі, ня сталі мяне нават забіраць. А вось судовы выканаўца працягваў паказваць свой характар.
Паводле Верамеенкі, судовы выканаўца скардзіцца на тое, што яго не пускалі ў кватэру, але Сяргей кажа, што нават амапаўцы разам зь ім знаходзіліся ў кватэры і спрабавалі залагодзіць канфлікт.
— Цяпер, як ні дзіўна, усе мае спадзяваньні на праўдзівыя сьведчаньні тых амапаўцаў, што прыходзілі на выклік. Яны былі сьведкамі таго, што судовы выканаўца яўна перавышаў свае паўнамоцтвы.
Суд над Верамеенкам адбудзецца 10 студзеня ў Ленінскім судзе Горадні.