Беларусь - Францыя 0:0. На «Барысаў-Арэне» - нацыянальныя сьцягі, «Жыве Беларусь!», «Купалінка» і «Тры чарапахі»

Зборная Беларусі па футболе стартавала ў кваліфікацыйным турніры да чэмпіянату сьвету 2018 году. Першым супернікам беларусаў на «Барысаў-Арэне» была каманда Францыі, фіналістка нядаўняга эўрапейскага першынства. Матч скончыўся ўнічыю - 0:0.

Ці не ўпершыню за апошнія гады на стадыёне футбольнага клюбу БАТЭ ў Барысаве быў аншляг — усе квіткі былі прададзеныя.

Беларуская фэдэрацыя футболу падрыхтавала своеасаблівы пэрформанс: да кожнага квітка бонусам прыкладалася белая майка з нацыянальным арнамэнтам і беларускамоўным надпісам «Белыя крылы». Агулам — 13 тысяч, па колькасьці месцаў. Майкі былі раскладзеныя на ўсіх крэслах на стадыёне, і як бачна па трыбунах, абсалютная большсьць заўзятараў іх надзелі.

На трыбунах назіраліся бел-чырвона-белыя сьцягі і герб «Пагоня». Заўзятары скандавалі «Жыве Беларусь!», сьпявалі «Купалінка», «Воінаў сьвятла» і «Трох чарапах».