Урад Расеі забараніў закупку замежнага праграмнага забесьпячэньня для дзяржаўных і муніцыпальных патрэбаў.
Выключэньне складуць тыя выпадкі, калі ў Расеі няма аналяга зь неабходнымі функцыянальнымі, тэхнічнымі і эксплюатацыйнымі характарыстыкамі, гаворыцца ў пастанове, падпісанай 20 лістапада расейскім прэм’ер-міністрам Дзьмітрыем Мядзьведзевым.
Прадугледжана стварэньне адзінага рэестра расейскіх праграм. Да ўдзелу ў тэндэрах дзяржзакупак ня будуць дапускаць замежны софт і іншыя IT-прадукты, калі ў іх ёсьць два і больш расейскіх аналягаў, гаворыцца ў пастанове.
Замежныя IT-кампаніі ўжо знайшлі спосаб, як абыйсьці пастанову ўраду. Яны ствараюць з расейскімі фірмамі сумесныя прадукты, прыдатныя пад вызначэньне «расейскае ПА», паведамляе РБК.
Раней Асацыяцыя эўрапейскага бізнэсу заяўляла, што найбуйнейшыя IT-кампаніі пакінуць расейскі рынак ва ўмовах «недакладных правілаў гульні» з дзяржкантрактамі.
Супраць законапраекту аб абмежаваньні дзяржзакупак імпартнага ПА выступілі Фэдэральная антыманапольная служба і Мінфін.