Судзьдзя загадаў заключыць прэзыдэнта Гватэмалы Ота Пэрэса Маліну пад варту на час слуханьняў аб яго меркаванай ролі ў маштабнай карупцыйнай схеме.
Рашэньне было прынятае празь некалькі гадзін пасьля таго, як прэзыдэнт сышоў у адстаўку.
У аўторак гватэмальскі парлямэнт пазбавіў Пэрэса Маліну недатыкальнасьці, дазволіўшы генэральнаму пракурору афіцыйна выставіць яму абвінавачваньне.
Сьледзтва падазрае, што прэзыдэнт датычны да крадзяжу мільёнаў даляраў у Нацыянальнай мытнай службы.
Як мяркуецца, Пэрэс Маліна і іншыя высокапастаўленыя службоўцы атрымлівалі адсотак ад хабараў, якія бізнэсоўцы плацілі мытні за вызваленьне ад выплаты пошлін на ўвоз тавараў.
Сам прэзыдэнт настойвае, што не рабіў нічога супрацьзаконнага.
У чацьвер віцэ-прэзыдэнт Алехандра Мальданада даў прысягу ў якасьці часовага кіраўніка дзяржавы напярэдадні прэзыдэнцкіх выбараў, якія пройдуць у нядзелю, 6 верасьня.