Прэтэндэнтка на пасаду прэзыдэнта Тацяна Караткевіч гэтак пракамэнтавала Радыё Свабода сёньняшняе вызваленьне палітвязьняў:
«Гэта найлепшая навіна, якая магла быць. Я вельмі радая за сем’і, родных, тых, хто ўсе гэтыя гады чакаў, спадзяваўся, верыў. Гэта было складанае выпрабаваньне.
Лукашэнка зрабіў крок насустрач Эўрапейскаму Зьвязу. Гэта ў першую чаргу з-за складанай эканамічнай сытуацыі.
Гэта вельмі правільны крок, які дазволіць разьвіваць адносіны паміж Эўрапейскім Зьвязам і Беларусьсю, што ў сёньняшніх умовах зьяўляецца пытаньнем нацыянальнай бясьпекі. Таксама гэта можа адкрыць для Беларусі новыя магчымасьці фінансавай дапамогі ад міжнародных арганізацый. Важна, каб і ў будучыні ў нас не зьявіліся новыя палітычныя зьняволеныя, а будучыя выбары прайшлі сумленна і адкрыта. Гэта сёньня трэба не Лукашэнку, гэта трэба ўсёй Беларусі».